14 снежня 2010 г. Святы Айцец Бэнэдыкт XVI цэлебраваў святую Імшу ў ватыканскім кляштары Mater Ecclesiae — Маці Касцёла. З кастрычніка 2009 г. у кляштары жыве супольнасць з 7 сясцёр Ордэна Звеставання Найсвяцейшай Панны Марыі (візітак), якая моліцца за Папу, супрацоўнікаў ведамстваў Апостальскай Сталіцы і ўвесь Касцёл.

Візіт Пантыфіка быў звязаны з завяршэннем святкавання 400-годдзя заснавання ордэна. У гаміліі Папа падкрэсліў, што Езус з’яўляецца канчатковым Божым Словам, скіраваным да чалавека, бо, аддаючы самога сябе, Ён паказаў сапраўднае аблічча Бога.

Прысутнасць у Ватыкане кантэмпляцыйных законных супольнасцяў звязана з ініцыятывай Яна Паўла ІІ, які жадаў, каб сёстры законныя маліліся ў інтэнцыі Папы, Апостальскай Сталіцы і ўсяго Касцёла. 13 мая 1994 г. у спецыяльна пабудаваны маленькі кляштар Mater Ecclesiae ў Ватыканскіх садах прыбылі сёстры кармэлітанкі, бэнэдыктынкі і візіткі. Было таксама пастаноўлена, што большасць сясцёр павінна паходзіць з адной краіны, што дазволіць ім адразу пасля прыбыцця распачаць рэгулярныя рэлігійныя практыкі без выдаткавання часу на вывучэнне мовы.

Акрамя малітвы, сёстры візіткі з Ватыкана займаюцца падрыхтоўкай літургічнага ўбрання для Папы, вырабляюць ружанцы і бялізну для святой Імшы. Гэтыя вырабы Пантыфік перадае ў дар найбольш бедным парафіям.