Кардынал Курт Кох лічыць, што абранне Папы з Лацінскай Амерыкі, адкуль паходзіць большасць хрысціян, — моцны сігнал. Па словах іерарха, які дагэтуль з’яўляўся старшынёй Папскай рады спрыяння хрысціянскаму адзінству, на Святы Пасад уступіў Пантыфік «з Касцёлаў бедных, з кантынента надзеі».

У размове з журналістамі кардынал заўважыў, што новаабраны Папа вялікую ўвагу ўдзяляе экуменізму, і ад яго варта чакаць далейшых імпульсаў у гэтай сферы. Паводле іерарха, Пантыфік лічыць адзінства хрысціян місіяй, даручанай Другім Ватыканскім Саборам.

Кардынал Кох перасцярог таксама перад думкай пра новага Пантыфіка як пра чалавека нібыта кансерватыўнага. Па словах іерарха, папа Францішак працягвае дзейнасць апосталаў і адначасова павінен рабіць новыя крокі ў будучыню. Таксама Святы Айцец добра ведае Рымкую Курыю, і правядзенне рэформаў, на думку кардынала, можа стаць для яго лёгкім.

Кардынал Курт Кох высока ацаніў і першую сустрэчу Папы з сабранымі на плошчы Св. Пятра вернікамі, падкрэсліўшы, што Пантыфік здабыў сэрцы людзей, калі пасля сардэчнага «добры вечар» папрасіў найперш аб малітве за свайго папярэдніка Бэнэдыкта XVI, а затым за сябе.

(AG)