24 лістапада ў Макасе (Эквадор) была беатыфікавана італьянская місіянерка з ордэна салезіянаў Марыя Транкацці. Беатыфікацыную ўрачыстасць узначаліў прэфект Кангрэгацыі па справах Кананізацыі кардынал Анджэла Амата, які таксама належыць да наступнікаў св. Яна Боска.

Як паведамляе Седмица.ru са спасылкай на сайт салезіянаў Эквадора, Марыя Транкацці была сястрой міласэрнасці і місіянеркай сярод карэнных народаў у даліне Амазонкі.

Будучая благаслаўлёная нарадзілася недалёка ад Брэшыі (поўнач Італіі) у 1883 г. У 1908 г. уступіла ў ордэн салезіянаў. Падчас Першай сусветнай вайны працавала сястрой міласэрнасці ў ваенным шпіталі. У 1922 г. паехала ў якасці місіянеркі ў Эквадор, дзе і заставалася ўсё жыццё. У джунглях Амазонкі, працуючы ў аддзяленні медыцынскай дапамогі, Марыя Транкацці лячыла хворых і аказвала ім духоўную падтрымку. Асаблівае значэнне надавала паляпшэнню становішча жанчын і дзяўчынак, а таксама пераадоленню напружанасці паміж індзейцамі і белымі пасяленцамі.

Марыя Транкацці загінула падчас авіякатастрофы 25 жніўня 1969 г.

(AG)