Пра «непарыўнае перапляценне» веры і міласэрнасці кажа папа Бэнэдыкт XVI у Пасланні на Вялікі пост, апублікаваным 31 студзеня. Святы Айцец заклікае вернікаў у кожнай справе міласэрнасці быць адлюстраваннем любові Хрыста да чалавека.

Святы Айцец Бэнэдыкт ХVI выказаў глыбокае спачуванне з нагоды пажару, які здарыўся 1 лютага ў будынку адміністрацыйнага цэнтра Дзяржаўнай нафтавай кампаніі ў Мехіка (Мексіка). Паводле папярэдніх звестак, у ім загінулі 33 чалавекі і многія атрымалі раненні.

Папа Бэнэдыкт XVI глыбока засмучаны навіной аб трагічным здарэнні ў венесуэльскай турме «Урыбана», у выніку якога загінулі больш за 50 чалавек і каля 90 атрымалі раненні. Святы Айцец скіраваў спачувальную тэлеграму на імя мясцовага арцыбіскупа Антоніа Хасэ Лопэса Кастэла.

У «глыбокім болю з прычыны трагічнай смерці соцень маладых людзей» у Санта-Марыя на поўдні Бразіліі запэўніў Святы Айцец Бэнэдыкт XVI у спачувальнай тэлеграме, скіраванай 28 студзеня. Падчас пажару на дыскатэцы ў гэтым горадзе загінуў 231 чалавек.

«У маёй памяці кардынал Глемп застанецца чалавекам шчырай дабрыні, які адзначаўся прастатой, адкрытасцю і сардэчнай адданасцю справе Касцёла ў Польшчы і ў свеце», — піша Святы Айцец Бэнэдыкт XVІ у спачувальнай тэлеграме на імя Мітрапаліта Варшаўскага кардынала Казімежа Ныча. Кардынал Юзаф Глемп, Прымас Польшчы на пенсіі, адышоў у вечнасць 23 студзеня.

«Мас-медыя патрабуюць удзелу ўсіх, хто ўсведамляе каштоўнасці дыялога, дыскусіі і лагічнай аргументацыі», — адзначае Святы Айцец Бэнэдыкт XVI у пасланні на Сусветны дзень сродкаў масавай камунікацыі. Пасланне апублікавана 24 студзеня, ва ўспамін св. Францішка Сальскага — апекуна супрацоўнікаў каталіцкіх СМІ.

«Служэнне святара як выхаваўцы належыць да важных аспектаў місіі Касцёла», — адзначыў папа Бэнэдыкт XVI у пасланні да італьянскага кангрэсу асістэнтаў руху «Каталіцкая акцыя». Тэмай кангрэсу, які пачаўся ў Рыме 21 студзеня, з’яўляецца роля асістэнта ў выхаванні свецкіх вернікаў.

19 студзеня папа Бэнэдыкт ХVІ накіраваў тэлеграму новаму Патрыярху Александрыйскаму Ісааку Ібрагіму Сідраку. Абранне Патрыярха адбылося 16 студзеня на пасяджэнні Сіноду Біскупаў Копцкага Касцёла ў Егіпце.

Святы Айцец Бэнэдыкт XVI звярнуўся да вернікаў з просьбай аб малітве за мір у Сірыі. Пантыфік падзяліўся сваім болем за-за цярпення сірыйскага народa і заклікаў спрыяць абароне свабоды сумлення.

Пытанні Бога і чалавека, які шукае сэнс жыцця і мір у свеце, дзе пануюць канфлікты, — «чырвоная нітка» прамоваў Святога Айца на працягу апошніх тыдняў. Аб гэтым піша ў газеце Апостальскай Сталіцы «L’Osservatore Romano» яе рэдактар Джаванні Марыя Віян.

Старшыня Прэс-службы Апостальскай Сталіцы кс. Фэдэрыка Ламбардзі звярнуў увагу на значэнне прывітання, якое папа Бэнэдыкт ХVI скіраваў новаму кіраўніцтву Кітайскай Народнай Рэспублікі падчас сёлетняга благаслаўлення «Urbi et Orbi». Святы Айцец нагадаў падчас благаслаўлення аб высокім заданні, якое чакае кітайскіх кіраўнікоў.

Аб неабходнасці адзінства хрысціян y нестабільныя часы, калі на Блізкім Усходзе пануе насілле, нагадаў Святы Айцец Бэнэдыкт XVI у звароце да новаабранага грэка-праваслаўнага Патрыярха Антыёхіі і ўсяго Усходу Яна Х. Іерарх быў абраны новым Патрыярхам Антыёхіі 17 снежня, пасля смерці свайго папярэдніка на гэтай пасадзе Патрыярха Ігнацыя IV.

Пра традыцыі святкавання Божага Нараджэння ў часы свайго дзяцінства сказаў наведвальнікам «Twitter» Святы Айцец Бэнэдыкт XVI. Адпаведны запіс быў апублікаваны ў мікраблогу Папы вечарам 24 снежня, пасля Імшы, якую Пантыфік цэлебраваў у базыліцы св. Пятра.

Выйшаў каментарый Святога Айца Бэнэдыкта XVI да яго кнігі «Дзяцінства Езуса» — апошняй у трылогіі «Езус з Назарэта». Каментарый змешчаны ў аўтарытэтнай фінансава-эканамічнай міжнароднай газеце «Financial Times».

1. Традыцыйна кожны год Каталіцкі Касцёл 1 студзеня адзначае Сусветны дзень міру, які быў устаноўлены папам Паўлам VI. З гэтай нагоды Пантыфік звяртаецца да народаў свету са спецыяльным Пасланнем. Дэвіз сёлетняга, ужо 46-га, Сусветнага дня міру ўзяты са славутага казання Езуса на гары: «Благаслаўлёныя міратворцы» (пар. Мц 5, 9). Ужо ў самым тытуле гэтага Паслання нагадваецца аб асобай ролі тых, хто змагаецца за мір: яны з’яўляюцца благаслаўлёнымі — гэта азначае, што яны падабаюцца Богу.

У сераду 19 снежня Святы Айцец Бэнэдыкт XVI правёў традыцыйную агульную аўдыенцыю. Свае разважанні Пантыфік прысвяціў веры Марыі, зрабіўшы гэта ў кантэксце «вялікай таямніцы Звеставання Найсвяцейшай Багародзіцы».

Святы Айцец Бэнэдыкт XVI выказаў свае спачуванні ў сувязі з крывавым інцыдэнтам у школе горада Ньютаўн у амерыканскім штаце Канэкцікут, дзе было забіта 26 чалавек, з якіх 20 — дзеці. У спачувальнай тэлеграме Пантыфік перадае шчыры смутак і малітоўную блізкасць ахвярам, іх сем’ям і ўсім пацярпелым.

«Верным слугой, руплівым святаром і здольным дыпламатам» назваў у спачувальнай тэлеграме Святы Айцец Бэнэдыкт XVI Апостальскага Нунцыя ў Кот-д’Івуары. Арцыбіскуп Амвросій Мадтха трагічна загінуў 8 снежня ў аўтакатастрофе падчас душпастырскага падарожжа на паўночным захадзе гэтай афрыканскай краіны.

Шчырыя спачуванні і выразы глыбокага смутку ў сувязі са смерцю Патрыярха Антыёхіі Ігнацыя IV выказаў Святы Айцец Бэнэдыкт XVI. Пантыфік даслаў тэлеграму на імя Мітрапаліта Геліопаліса Спірыдона, у якой падкрэсліў заслугі спачылага для паяднання і міру паміж людзьмі і збліжэння паміж католікамі і праваслаўнымі.

Папа Бэнэдыкт XVI і Патрыярх Канстанцінопальскі Барталамей падкрэслілі важнасць дасягнення адзінства паміж католікамі і праваслаўнымі. Пантыфік павіншаваў Патрыярха са святам св. Андрэя, на якое ў Стамбул прыбыла дэлегацыя з Апостальскай Сталіцы. Патрыярх Барталамей падчас літургіі ў храме св. Андрэя назваў Другі Ватыканскі Сабор «паваротным момантам у адносінах паміж католікамі і праваслаўнымі».