Прыбыццё Бэтлеемскага агню ў Беларусь, Часовы павераны ў справах Апостальскай Нунцыятуры, выданне на беларускай мове папскай булы, падрыхтоўка да Божага Нараджэння і іншыя падзеі з жыцця Касцёла ў Беларусі за апошні тыдзень.

Семінарысты з Гродна наведалі дзяцей у доме-інтэрнаце ў Галавічполлі

На працягу многіх гадоў навучэнцы Вышэйшай духоўнай семінарыі ў Гродне наведваюць дзіцячыя прытулкі і дамы Гродзенскага раёна. 16 снежня семінарысты сустрэліся з дзецьмі-інвалідамі з дома-інтэрната ў вёсцы Галавічполле. Пераважная большасць насельнікаў гэтага дома-інтэрната — сіроты або дзеці, ад якіх адмовіліся бацькі.

Падчас сустрэчы семінарысты на чале з прэфектам кс. Андрэем Лішко спрабавалі адарыць дзяцей любоўю і радасцю надыходзячага свята, правялі катэхезу пра Божае Нараджэнне. Потым усе разам падзяліліся аплаткай і спявалі калядныя песні.

Супрацоўнікі «Caritas» з усёй Беларусі сабраліся разам на калядную сустрэчу

Па традыцыі падчас каляднай сустрэчы кіраўнікі дыяцэзіяльных «Caritas» робяць справаздачу аб дзейнасці за мінулы год, дзелячыся сваімі дасягненнямі, радасцямі, а таксама планамі на будучы год.

На сустрэчы прысутнічаў Мітрапаліт Мінска-Магілёўскі арцыбіскуп Тадэвуш Кандрусевіч, старшыня Рады па справах дабрачыннасці, справядлівасці і міру пры ККББ біскуп Віцебскі Алег Буткевіч і кіраўнікі дыяцэзіяльных «Caritas».
 

Арцыбіскуп Клаўдыё Гуджэроцці прыступіў да дыпламатычных абавязкаў у братняй Украіне, і да прыезду новага Апостальскага Нунцыя Часовым павераным у справах Апостальскай Нунцыятуры ў Беларусі прызначаны сакратар Апостальскай Нунцыятуры мансеньёр Марынка Антолавіч.

Святар паходзіць з Босніі і Герцагавіны. У 2011 годзе ва ўніверсітэце Urbaniana у Рыме атрымаў ступень доктара біблійнай тэалогіі. Да прыезду ў Беларусь займаў пасаду сакратара Пастаяннага Прадстаўніцтва Святога Пасаду пры міжнародных арганізацыях у Вене.

Выданне булы «Misericordiae Vultus» па-беларуску здзейснена пры падтрымцы Ордэну Меншых Братоў Капуцынаў.

Раней лічбавы тэкст быў змешчаны на Catholic.by у раздзеле Юбілейны Год Міласэрнасці. Пераклад на беларускую мову быў падрыхтаваны Секцыяй па перакладзе літургічных тэкстаў і афіцыйных дакументаў Касцёла пры ККББ.

Була Святога Айца Францішка аб распачацці ў Каталіцкім Касцёле Надзвычайнага Юбілею Міласэрнасці распавядае пра ўмовы яго правядзення і духоўныя плёны гэтага Юбілею.

«Беларусь, не бойся прызнаць у Хрысце Сына Божага»: пастырскае пасланне арцыбіскупа Тадэвуша Кандрусевіча на Божае Нараджэнне

У пастырскім пасланні на Божае Нараджэнне 2015 Мітрапаліт Тадэвуш Кандрусевіч заклікаў беларусаў даверыцца Богу.

«Беларусь, не бойся прызнаць у Хрысце Сына Божага, прымі Яго і даверся Яму! Ён сваёй любоўю залечыць твае раны, прывядзе да так патрэбнага ўсім нам цуду паяднання і ўчыніць цябе новай і шчаслівай!», — піша арцыбіскуп у сваім пасланні.

Іерарх параўнаў жыццё чалавека, які не прыслухоўваецца да Божых наказаў, з «Тытанікам».

«Мы самі сабе ствараем сітуацыю глыбокага маральнага крызісу і ў пэўным сэнсе нагадваем “Тытанік”, на якім, нягледзячы на набліжэнне катастрофы, аркестр граў да апошняй хвіліны, а пасажыры пілі шампанскае».

Арцыбіскуп заклікаў вернікаў адкрыцца на духоўную рэвалюцыю ў сваім сэрцы і наследаваць Хрыста, каб «мы не дазволілі спіхнуць сваю веру на ўзбочыну жыцця, але з высока паднятай галавой ішлі праз яго, ведаючы, што нашай мэтай ёсць шчаслівая вечнасць».

Аплаткавая сустрэча духавенства Гродзенскай дыяцэзіі з біскупам Аляксандрам Кашкевічам прайшла ў Гродне

Гродзенскі ардынарый падзякаваў усім святарам дыяцэзіі за ахвярнае служэнне ў сваіх парафіяльных супольнасцях і за душпастырскія ініцыятывы, рэалізаваныя ў парафіях.

«Дзякую за кожны жэст чалавечнасці, скіраваны да вашых вернікаў, — сказаў іерарх. — Няхай вашы святарскія сэрцы будуць заўсёды чулымі да чалавечых бедаў і праблем. Будзем заўсёды спяшацца з дапамогай да тых, хто яе чакае».

Біскуп Аляксандр Яшэўскі SDB падзяліўся аплаткай з медперсаналам і пацыентамі абласнога клінічнага шпіталя ў Мінску

Супольная малітва, урывак са Святога Пісання, які прачытаў супрацоўнік шпіталя, прамова біскупа, калядкі і добрае слова, прамоўленае адзін да аднаго, а таксама наведванне некаторых пацыентаў сталі ключавымі момантамі сустрэчы.

У Бараўлянах служаць ксяндзы салезіяне, таму, як адзначыў біскуп Аляксандр Яшэўскі, яму вельмі прыемна было раздзяляць гэты радасны момант свайго святарскага служэння з медперсаналам і пацыентамі, памаліўшыся разам з імі і падзяліўшыся аплаткай менавіта тут.

Катэхеты Мінска-Магілёўскай архідыяцэзіі сабраліся на аплаткавую сустрэчу ў сталічным Чырвоным касцёле

У аплаткавай сустрэчы з Мітрапалітам Мінска-Магілёўскім арцыбіскупам Тадэвушам Кандрусевічам прынялі ўдзел катэхеты Мінска-Магілёўскай архідыяцэзіі, студэнты і выкладчыкі «Мінскага Тэалагічнага каледжа імя св. Яна Хрысціцеля».

Арцыпастыр заклікаў катэхетаў і студэнтаў тэалагічнага каледжа быць пратаганістамі св. Яна Хрысціцеля — прыкладам веры для іншых.

«Кожны з нас атрымаў ад Бога шматлікія дары, якія дазваляюць нам выканаць Божы план і дапамагчы іншым наблізіцца да Хрыста. Ад нас саміх залежыць, ці пазнае свет Бога і ці даверыцца Яму».

Каталіцкую моладзь Беларусі запрасілі на Сусветныя Дні Моладзі ў Кракаў па-беларуску

Ролік «Не спазніся» з заклікам на нацыянальных мовах удзельнікаў Сусветных Дзён Моладзі (СДМ) у Кракаве-2016 прэзентавала медыяльная група падрыхтоўкі да СДМ.

У запісе праекта прыняў удзел і беларус — семінарыст з супольнасці салезіянаў Артур Ляшнеўскі SDB.

У Беларусь прыбыў Бэтлеемскі агонь

18 снежня на польска-беларускай мяжы скаўты Польшчы перадалі Бэтлеемскі агонь — Святло міру — скаўтам з Беларусі.

19 снежня агонь з Бэтлеема распачаў сваю вандроўку па Беларусі. Першай святыняй, куды было ўнесена Святло міру, стаў катэдральны касцёл св. Францішка Ксаверыя ў Гродне. У той жа дзень Бэтлеемскі агонь быў унесены ў мінскую архікатэдру.

«Па Беларусі агонь мы перавозім звычайна ў машынах. Перадача ажыццяўляецца ад адной скаўцкай адзінкі да другой. Кожная адзінка развозіць агонь у сваю і навакольныя парафіі. Дарога далёкая, таму мы выкарыстоўваем бяспечныя лампады, у якіх агонь можна перавозіць і якія не згаснуць ад лёгкага ветрыку», — распавёў Сatholic.by асістэнт генеральнага камісара скаўтаў Беларусі Улад Мацельскі. У перавозцы агню па Беларусі прымае ўдзел 15 скаўтаў.

Ілья Лапато