Трэці год запар каманда святароў Гродзенскай дыяцэзіі спрабавала свае сілы ў Еўрапейскім чэмпіянаце сярод святароў па міні-футболе. Сёлета ён праходзіў у Славеніі, а яго пераможцам стала каманда з Польшчы. Беларусы занялі 8 месца сярод 13 каманд. Да прызавых месцаў дайсці не ўдалося, але вынік атрымаўся лепшым, чым у мінулым годзе.

«Для нас гэта (чэпіянат — рэд.) у першую чаргу магчымасць падзяліцца сваім душпастарствам, якое мы праводзім у сваёй краіне, мы распавядаем пра Беларусь, як тут жывуць людзі. Усім вельмі цікава і многія задаюць пытанні, — прыводзіць словы прадстаўніка каманды кс. Салабуды сайт grodnensis.by. — А праз спорт мы абвяшчаем Бога: гэта і ёсць новая евангелізацыя, таму што моладзь, якая прыходзіць падтрымаць нас, глядзіць на нас, а мы праз свае паводзіны паказваем Бога. Вялікая справа, якая, я лічу, будзе мець далейшае развіццё. Спорт становіцца яшчэ адным сродкам у вялікай справе евангелізацыі. Мы маем доступ да той моладзі, якая не вельмі часта ходзіць у Касцёл».

У складзе беларускай каманды выступалі адзінаццаць футбалістаў-святароў на чале з трэнерам Яўгенам Сакалоўскім. Менавіта гэта каманда выйграла сёлета Першы чэмпіянат Беларусі па міні-футболе сярод святароў. Еўрапейскі ж чэмпіянат сярод святароў па міні-футболе ўпершыню адбыўся ў 2005 годзе.

(SZh)