Папскім пасланцом на ўрачыстае святкаванне 300-годдзя кансэкрацыі мінскага архікатэдральнага касцёла Бэнэдыкт XVI прызначыў кардынала Юзафа Томко, былога Прэфекта Кангрэгацыі Евангелізацыі Народаў. Урачыстасць адбудзецца 9 кастрычніка 2010 г. Святочныя мерапрыемствы распачнуцца ў 12.00.

За апошнія 13 гадоў гэта ўжо трэці спецыяльны пасланец Папы, які прыбывае ў нашу краіну і трэці раз — у мінскую архікатэдру. Першым папскім пасланцом быў кардынал Казімір Шока, які прыбыў у 1997 г. на рэкансэкрацыю святыні. Другі пасланец Папы кардынал Камілло Руіні наведаў мінскую архікатэдру ў 2000 г. з нагоды заканчэння Сіноду Мінска-Магілёўскай архідыяцэзіі, Пінскай і Віцебскай дыяцэзій.

Суправаджаць надзвычайнага пасланца Папы прызначаны:

• кс. прэлат Эдмунд Даўгіловіч-Навіцкі, пробашч парафіі Святога Юзафа ў Маладзечне;
• а. Бярнард Радзік OCD, пробашч парафіі Святога Андрэя, апостала, у Нарачы.

Пасланец Папы (лац. legatus — легат) — прадстаўнік Святога Айца як пры асобных Касцёлах, так і пры дзяржавах ці ўрадах, куды ён быў накіраваны. Пасланец Папы дзейнічае ад імя Святога Айца.