Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
На пытанні моладзі адказваюць іерархі Беларусі
Беларусь - Мінска-Магілёўская архідыяцэзія
06.08.2011 14:45

Што сёння цікавіць каталіцкую моладзь Беларусі? Якія праблемы Каталіцкага Касцёла нашай краіны яе клапоцяць? Даведацца аб гэтым можна вельмі проста — задаўшы пытанне. Менавіта гэта і вырашылі зрабіць арганізатары сустрэчы моладзі ў Івянцы, і запланавалі дыялог моладзі з біскупамі.

На пытанні маладых людзей адказвалі Мітрапаліт Мінска-Магілёўскі арцыбіскуп Тадэвуш Кандрусевіч і архімандрыт Сяргей Гаек, Апостальскі Візітатар для грэка-католікаў Беларусі. Пытанні можна было дасылаць і праз сайт Catholic.by.

Напачатку Мітрапаліт Тадэвуш Кандрусевіч распавёў сціслую гісторыю і традыцыю святкавання Сусветнага дня моладзі і ўдзелу ў ім моладзі з краін былога СССР. Пасля кожны жадаючы мог задаць пытанне.

На жаль, традыцыйнымі аказаліся пытанні пра планы выдання беларускай літургічнай літаратуры, у прыватнсці брэвіярыя (літургіі гадзінаў) і Бібліі. Традыцыйнымі, бо праца гэта працяглая, а продаж папярэдне выдадзенай літаратуры не вельмі радуе. Многія наклады застаюцца не раскупленымі. Аднак, паводле слоў Мітрапаліта, праца ідзе, і плануецца, што першы том брэвіярыя будзе выдадзены ў канцы наступнага года. А вось на выданне беларускай Бібліі ў нашага Касцёла “яшчэ не хапае сілы”.  

У святле апошніх падзей актуальным было пытанне аб верагоднасці з’яўлення ў Беларусі новых біскупаў. На што арцыпастыр заклікаў вернікаў маліцца ў дадзенай інтэнцыі:

Прызначае біскупаў Святы Айцец. Тое самае і са святарамі экзарцыстамі. Бо няма школы біскупаў ці экзарцыстаў, а для іх з’яўлення павінны быць належныя кандыдаты, з багатым вопытам працы.

У дасланых пытаннях закраналася верагоднасць цэлебравання ў Мінску літургіі паводле Трыдэнцкага абраду. Па словах Мітрапаліта Кандрусевіча, усё магчыма, але недастаткова жадання аднаго чалавека павінна быць група людзей, адпаведна падрыхтаваны святар, міністранты.

Наведвальнікі Catholic.by цікавіліся таксама стаўленнем Каталіцкага Касцёла да гамеапатычных лекаў. Па словах Мітрапаліта, Апостальская Сталіца не забараняе іх прымяненне, але і не заахвочвае да гэтага. Аднак у свой час былы старшыня Папскай рады па культуры кардынал Поль Пупар адзначаў, што распаўсюджванне гамеапатычных сродкаў спрыяе распаўсюджванню руху “New Age”.

З асабістымі пытаннямі да іерархаў можна будзе звяртацца падчас працы ўсёй ІІ Усебеларускай сустрэчы моладзі.

Святлана Жылевіч

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.