Святая Імша за Вацлава Гавэла, памерлага першага Прэзідэнта Чэхіі, адбылася ў мінскім архікатэдральным касцёле 4 студзеня 2012 года. Літургію ўзначаліў  Апостальскі нунцый у Беларусі арцыбіскуп Клаўдыё Гуджэроцці.

За апошняга прэзідэнта Чэхаславакіі і першага прэзідэнта Чэхіі маліўся таксама дапаможны біскуп Мінска-Магілёўскай архідыяцэзіі Антоні Дзям’янка, святары, прадстаўнікі пасольства Чэхіі і Славакіі і шматлікія вернікі.

Арцыбіскуп Клаўдыё Гуджэроцці падкрэсліў, што Вацлаў Гавэл быў палітыкам, які заўсёды бараніў правы чалавека і стаяў на баку хрысціянскіх каштоўнасцяў.

«Мы смуткуем з нагоды страты такога вялікага чалавека, палітыка, былога Прэзідэнта Чэхіі Вацлава Гавэла. Няхай добры Бог даруе яму ўсе правіны і дасць яму вечны спакой у краіне святла, радасці і вечнага шчасця», — адзначыў біскуп Антоні Дзям’янка.

Вацлаў Гавэл — апошні прэзідэнт Чэхаславакіі (1989–1992 гг.) і першы прэзідэнт Чэхіі (1993–2003 гг.) — памёр у Празе 18 снежня 2011 года.