Gloria in Excelsis Deo — гэтае анёльскае прывітанне прыгожым спевам гучала ўжо ў 10-ы раз на фестывалі калядных песень у Іўі. На фестывалі, які адбыўся 27 студзеня ў іўеўскім Доме культуры, прысутнічаў Мітрапаліт Мінска-Магілёўскі арцыбіскуп Тадэвуш Кандрусевіч.

Кожны год фестываль карыстаецца вялікай папулярнасцю і выяўляе майстэрства ўдзельнікаў. Сёлета свята ў Іўі распачалося літургіяй у касцёле свв. апосталаў Пятра і Паўла, якую ўзначаліў духоўны айцец Вышэйшай духоўнай семінарыі ў Гродне кс. Валерый Быкоўскі. Імшу ўпрыгожыў спевам хор з мінскага Чырвонага касцёла.

На фестываль прыбылі гледачы з Іўя і з усяго наваколля. Таксама на свяце прысутнічаў консул Рэспублікі Польшча ў Гродне Андрэй Хадкевіч.

Арганізатар фестывалю кс. Ян Гавэцкі ў размове з Catholic.by распавёў, што ідэя яго заснавання нарадзілася выпадкова, але сустрэла вялікую зацікаўленасць і ўвагу з боку не толькі католікаў, але і прадстаўнікоў іншых веравызнанняў. На працягу стагоддзяў Іўе славіцца добрымі адносінамі паміж хрысціянамі, іўдзеямі і мусульманамі. Пацвярджэнне гэтай еднасці і згоды — помнік у гонар сяброўства і адзінства канфесій Іўеўшчыны, адкрыты 16 чэрвеня 2012 г. у цэнтры Іўя. Ксёндз Ян Гавэцкі дадаў, што праз фестываль усе вучацца спяваць калядныя песні, тым самым захоўваючы атмасферy свята Божага Нараджэння на доўгі час.

Да гасцей фестывалю звярнуўся Мітрапаліт Тадэвуш Кандрусевіч. Іераpх падзякаваў іўеўскай парафіі, асабліва пробашчу кс. Яну Гавэцкаму, і мясцовым дзяржаўным уладам за арганізацыю фестывалю. Праўда Богаўцелаўлення, як адзначыў арцыпастыр, абвяшчаецца не толькі словам, але і праз культуру і мастацтва, і менавіта іх неабходна больш актыўна выкарыстоўваць у абвяшчэнні Евангелля. Аб неабходнасці абвяшчаць Евангелле праз культуру і мастацтва гаварылася і падчас мінулагодняга Сіноду Біскупаў па новай евангелізацыі. Таму, дадаў Мітрапаліт, фестываль каляднай песні ў Іўі арганічна ўпісваецца ў праграму жыцця і дзейнасці Касцёла на сучасным этапе яго развіцця. Іерарх павіншаваў пераможцаў і ўсіх удзельнікаў фестывалю і пажадаў ім поспеху ў будучым.

Фестываль у Іўі кожны год збірае вельмі шмат удзельнікаў. Выступленні ацэньвае журы, якое напрыканцы ўручае ўзнагароды. Кожная група, парафія, хор і супольнасць жадаюць як найлепш прадставіць сваё майстэрства, а арыгінальнасць у выкананні надае навізну нават вядомым песням. Ансамбль «Пасланнікі анёлаў» з парафіі Перамянення Пана ў Юрацішках умела злучыў спеў з танцам паланезу. «Езусавы ноткі» з Геранёнаў парадавалі інструментальным выкананнем. А ўзнагароду гран-пры атрымаў ансамбль «Оremus» з іўеўскай парафіі Святых апосталаў Пятра і Паўла.

«Выходзячы на сцэну, адчуваю страх, але падчас выступлення гляджу на зал, каб убачыць усмешкі людзей, — прызнаўся Аляксандр Панасевіч з парафіі ў Геранёнах. — І, калі ўбачу радасць у вачах гледачоў, — напэўна, супакоюся». Вялікай радасцю стала для хлопца пачуць, што ён заняў першае месца ў катэгорыі салістаў старэйшай групы.

Ансамбль «Jutrzenka» з іўеўскай парафіі выканаў калядкі з пажаданнямі, адрасаванымі ўсім людзям. «У гэтым спеве мы пажадалі людзям моцнай веры, — адзначыла Маргарыта Захар з ансамбля. — Асабліва зараз, у гэты Год веры, хацелася б, каб усе, хто згубіў Бога, нанава знайшоў шлях да Яго». «Вера для мяне — гэта спеў калядак, бо праз гэта я набліжаюся да Бога і дапамагаю іншым Яго адкрыць», — дадала ўдзельніца.

Ігнацій Пішчык з Іўя, які адзначыўся вельмі арыгінальным сольным выкананнем, прызнаўся, што «жадаў адчуць сябе на сцэне сапраўднай зоркай». Пра падобнае марыць і Анастасія Лашакоўская, якая спадзяецца «з маленькай сцэны раённага Дома культуры выйсці на вялікую сцэну, дзе будуць тысячы гледачоў».

Спеў і ўдзел у фестывалі прыносіць артыстам радасць — у гэтым упэўнена Вераніка Захар, па словах якой «голас — талент і дар ад Бога», а калядныя песні «напоўнены чымсьці таямнічым, у іх жыве цеплыня, любоў і мір».

Усе ўдзельнікі выступлення атрымалі ўзнагароды. Са шкадаваннем прысутныя развітваліся з юбілейным дзясятым фестывалем. Час выканання каляднай песні кароткі, але яшчэ доўга пасля гэтага песня можа гучаць у нашых сэрцах.

Кс. Юрый Марціновіч    

(AG)