Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Ад Ліхені да Падуі: вернікі з Іўя наведалі еўрапейскія санктуарыі
Беларусь - Гродзенская дыяцэзія
07.05.2013 14:32

Больш за 6500 кіламетраў праехалі вернікі з Іўя на чале з пробашчам парафіі апосталаў Пятра і Паўла кс. Янам Гавецкім. Адмысловая пілігрымка, падчас якой удалося наведаць знакамітыя еўрапейскія санктуарыі і святыні (Непакалянуў, Ліхень, Парыж, Лурд, Ля Салет, Падуя, Венецыя, Лагеўнікі) прайшла па ініцыятыве пробашча і была прымеркавана да Года веры.

Пілігрымы, сярод якіх акрамя католікаў былі таксама і праваслаўныя вернікі з Іўя, знаходзіліся ў дарозе адзінаццаць дзён. Некаторыя выправіліся ў незвычайнае падарожжа ўпершыню, для кагосьці паездка і ўвогуле стала першай замежнай у жыцці.

«Падобныя пілігрымкі стараемся ладзіць штогод па меры магчымасці, — распавядае кс. Ян Гавецкі. — Ужо былі падарожжы ў Чэнстахову і ў святыя месцы Італіі. Сёлета найбольш уразіў і запомніўся Лурд. Асабліва ўрэзаўся ў памяць вобраз хворых, якія, пераадолеўшы дзясяткі і тысячы кіламетраў, з вялікай надзеяй у вачах прыйшлі пакланіцца Маці Божай, адкрываючыся на яе ласку…».

Гэтае падарожжа паводле пробашча для ўсіх удзельнікаў пілігрымкі было не толькі напоўнена незабыўнымі эмоцыямі, але і служыла ўмацаваннем веры пілігрымаў. Пасля вяртання ў Беларусь у парафіі св. Пятра і Паўла ўжо адбылася адна з першых сустрэч, дзе пілігрымы дзяліліся ўражаннямі.

«У дарозе мы маліліся за паўсюдны Касцёл, за Беларусь, за дыяцэзію і родную парафію, — дадае кс. Ян. — Пілігрымка была духоўна плённай, таму дадому мы вярнуліся духоўна ўмацаванымі».

(JLS)

 

 

Пры выкарыстанні матэрыялаў сайта спасылка на Catholic.By абавязкова.