Падчас сёлетніх урачыстасцяў у Будславе браты меншыя капуцыны запрашаюць усіх жадаючых на капучына і не толькі. У спецыяльна адведзенай палатцы вы зможаце пакаштаваць смак Божага слова падчас размовы з братамі капуцынамі і бліжэй пазнаёміцца з жыццём ордэна.

Палатка будзе змяшчацца ў парку перад базылікай і насіць назву «У капуцына». Што вас там чакае:

Кава, капучына і гарбата

Ці можа быць штосьці лепшае для стомленага пілігрыма? Хаця капучына з’яўляецца кававым напоем італьянскай кухні, аднак яго назва сапраўды паходзіць ад назвы ордэна капуцынаў. Капуцыны пачалі дадаваць у каву малако, чаго ніхто не рабіў раней. Першым зрабіў гэта ў XVII ст. бл. Марк Давіана, капуцын з Венецыі.

Каляндар на 2013 г.

З нагоды юбілею Віцэправінцыі капуцынаў у Беларусі быў выдадзены каляндар на 2013 г. Старонка за старонкай гэты каляндар распавядае пра розныя аспекты духоўнасці ордэна, такія, як малітва, праца, адпачынак і інш. Усё гэта праілюстравана фотаздымкамі з жыцця ордэна капуцынаў у Беларусі, на якіх вы знойдзеце шмат вядомых вам асобаў. Каляндар таксама змяшчае ў сабе выказванні св. Францішка, і носіць назву «Супакой і дабро».

Цаглінка на будову касцёла

Так называюцца ўлёткі з інфармацыяй аб маладзечанскім касцёле, які на дадзены момант дабудоўваецца і будзе насіць тытул св. айца Піо з П’етрэльчыны. Святыня ўзводзіцца на сродкі вернікаў, таму на картках будзе таксама разліковы рахунак для ахвярадаўцаў. Усе сродкі, выручаныя за продаж у капуцынскай палатцы падчас будслаўскага фэсту, будуць перададзены на будаўніцтва касцёла ў Маладзечне.

Простыя словы, простыя рэчы…

Урэшце рэшт можна проста пагутарыць з братамі, задаць розныя пытанні і проста пазнаёміцца бліжэй з гэтымі цікавымі людзьмі. Запрашаем!

Аляксандра Шчыглінская