«У будслаўскім санктуарыі мы праслаўляем Марыю не таму, што яна была вельмі вядомай у сваім асяроддзі, а таму, што такою не была. Веліч Марыі крыецца ў тым, што Яна, будучы звычайнай дзяўчынай, згадзілася з Божым выбарам насіць у сваім улонні Збаўцу і нарадзіць Яго свету», — падкрэсліў Мітрапаліт Тадэвуш Кандрусевіч падчас начной літургіі ў Будславе 7 ліпеня 2012 г.

У гісторыі збаўлення і гісторыі чалавецтва, як сцвердзіў у гаміліі іерарх, ёсць мноства прыкладаў, калі Бог «выкарыстоўвае простых і пакорных людзей для вялікіх мэтаў». «Таму пакора і нязломная вера — гэта тыя цноты, якім мы павінны вучыцца ў Марыі», — дадаў мітрапаліт.

Іерарх заклікаў удзельнікаў будслаўскага фэсту і тых, хто далучыўся да святкавання праз онлайн-трансляцыю, ацаніць сябе па шкале пакоры. Для гэтага арцыпастыр даў кірунак для разважання: «Пакорны чалавек — гэта той, які ведае ўсю праўду пра сябе. Ён ведае, што жыццё, годнасць, ласку збаўлення, свабоду і здольнасць да любові атрымаў дарма. Таму чалавек пакорнага сэрца найперш з’яўляецца кімсьці ўдзячным; удзячным Богу і людзям за атрыманыя дары і ласкі. Такою была Марыя».