27 кастрычніка асвячэннем новага касцёла святога Бэнэдыкта ў Пінску пачаліся ўрачыстасці 90-годдзя заснавання Пінскай дыяцэзіі і духоўнай семінарыі i 145-й гадавіны нараджэння першага біскупа Пінскага Слугі Божага Зыгмунта Лазінскага.

Касцёл святога Бэнэдыкта быў узведзены за вельмі кароткі час — пяць месяцаў. Гэты касцёл будзе яднаць католікаў з трох новых мікрараёнаў горада: Лугі, Верасы, Радужны і Паўднёвы, у якіх жыве каля 70 тысяч чалавек. Гэтая падзея стала для Пінска знакавай. Касцёл св. Бэнэдыкта — другая каталіцкая святыня ў горадзе і першая, пабудаваная там пасля амаль двухсотгадовага перапынку. Насельніцтва Пінска на сённяшні дзень складае каля 130 тысяч чалавек.

На тэрыторыі парафіі пражывае шмат маладых сем’яў. На ўрачыстасці было шмат дзяцей і моладзі, што сведчыць аб тым, што парафія мае будучыню. У вачах многіх прысутных заўважалася радасць.

На ўрачыстасць прыбыло шмат запрошаных гасцей. Узначаліў урачыстасць Мітрапаліт Мінска-Магілёўскі арцыбіскуп Тадэвуш Кандрусевіч. Прысутнічалі Апостальскі Нунцый у Беларусі арцыбіскуп Клаўдыё Гуджэроцці, усе біскупы Беларусі, біскуп Луцкай дыяцэзіі (Украіна) Віталій Скамароўскi, Апостальскі візітатар для грэка-католікаў Беларусі архімандрыт Сяргей Гаек, духавенства з Беларусі і замежжа, прадстаўнікі дзяржаўнай улады і дыпламатычнага корпусу.

Святыня — выраз патрэбы грамадства

Біскуп Пінскі Антоні Дзям’янка, вітаючы сабраных, адзначыў, што назва новага касцёла «звязана з бэнэдыктынскай духоўнасцю, якую развівалі прадстаўнікі гэтага ордэну на Піншчыне ў Гарадзішчы».

«У 1662 годзе бэнэдыктынцы збудавалі там прыгожы касцёл. Сваім хараством і веліччу гэты храм не саступаў нашай катэдры. На працягу стагоддзяў манахі згодна з дэвізам заснавальніка, св. Бэнэдыкта з Нурсіі — “Маліся, працуй і нясі людзям надзею”, — перадавалі багацце сваёй духоўнасці палешукам. Святы Бэнэдыкт з’яўляецца пачынальнікам манаскага жыцця Касцёла лацінскага абраду, апекуном Еўропы», — нагадаў іерарх.

«Падчас Другой сусветнай вайны гітлераўцы ўзарвалі касцёл у Гарадзішчы і знішчылі шматвяковую спадчыну, якая пакаленнямі веруючых захоўвалася ў творах сакральнага мастацтва і архітэктуры. На памяць аб страчанай спадчыне пінчукі збудавалі касцёл пад іменем св. Бэнэдыкта, — адзначыў пінскі ардынарый. — Гэтая будоўля з’яўляецца не толькі памяццю пра мінулае, але і выразам патрэбы сучаснага грамадства ў святыні. Будаўніцтва касцёла пачалося па жаданні вернікаў, якія тут пражываюць».

Касцёл — месца спаткання чалавека з Богам і будавання супольнасцi

Мітрапаліт Тадэвуш Кандрусевіч у гаміліі сказаў: «Калi мы глядзiм на новы касцёл, то найперш здзіўляемся таму, як хутка ён быў пабудаваны. У гэтым заслуга бiскупа, пробашча, вернiкаў, спонсараў, архiтэктараў, дзяржаўных уладаў, якiя далi дазвол, будаўнiкоў».

«Здзiўляючыся так хутка пабудаванаму Божаму дому i яго архiтэктуры, мы павiнны задацца iншым пытаннем: а для чаго ён быў пабудаваны? Каб быць чарговым упрыгажэннем старажытнага Пiнска? Гэта не далёка ад праўды. Аднак касцёл — гэта не проста будынак, якiх кожны год будуецца шмат, — дадаў арцыпастыр. — Гэта сакральнае месца, месца спаткання чалавека з Богам, месца будавання касцёльнай супольнасцi як Божага народу».

«У цэнтры новага касцёла мы бачым алтар — месца, дзе здзяйсняецца Эўхарыстычная ахвяра, падчас якой на нашых вачах нараджаецца Эўхарыстычны Хрыстус, каб быць Богам з намi i быць хлебам вечнага жыцця», — нагадаў Мітрапаліт і дадаў, што «ў будаваннi Касцёла, як Божага народу, Эўхарыстыя мае выключнае значэнне».

Арцыбіскуп Тадэвуш Кандрусевіч назваў сiмвалiчным тое, што новы касцёл названы ў гонар св. Бэнэдыкта, апекуна Еўропы, якому належаць словы «Ora et labora» — «Малiся i працуй».

«Яны маюць вельмi важнае значэнне ў культуры сучаснага секулярызаванага свету, якi iмкнецца толькi да таго, каб як мага больш мець, i такiм чынам выхоўвае працаголiкаў, — падкрэсліў Мітрапаліт. — Няхай жа гэты тытул касцёла нагадвае нам аб тым, што мы павiнны не толькi працаваць, але i малiцца».

«Гэты будынак уяўляе сабой жывую памяць і вялікую надзею на будучыню»

На заканчэнне ўрачыстасці да прысутных звярнуўся Апостальскі Нунцый у Беларусі арцыбіскуп Клаўдыё Гуджэроцці. Прадстаўнік Святога Айца павіншаваў усіх вернікаў, найперш парафіян, з радаснай падзеяй асвячэння новага касцёла.

«Сёння гэты будынак уяўляе сабой жывую памяць пра ўсе тыя пакуты і ўсе жыцці, якія былі аддадзены. Таксама ён уяўляе сабой вялікую надзею на будучыню, — сказаў арцыбіскуп. — Бо мы не толькі Касцёл, які жыве ўспамінамі, — мы Касцёл місійны, які жыве моцай Езуса і жаданнем прапаведаваць Евангелле».

«Асабліва моладзі, тут прысутнай, даручаю ад імя Папы Францішка задачу быць жывымі сведкамі веры — і ў гэтым касцёле, і ўсюды, дзе ёй давядзецца жыць, працаваць і дзейнічаць», — дадаў Апостальскі Нунцый.

На заканчэнне Імшы біскуп Антоні Дзям’янка падзякаваў усім за ўдзел ва ўрачыстасці, выказаў падзяку тым, хто паспрыяў узвядзенню прыгожай святыні, хто матэрыяльна і духоўна падтрымліваў будаўніцтва. Пінскі ардынарый падзякаваў таксама пробашчу парафіі Св. Бэнэдыкта кс. Андрэю Рылку за яго працу і падыход да адказнай задачы, якую ён выканаў на высокім узроўні.

«Дзякуем Усемагутнаму Богу за магчымасць удзелу ва ўрачыстасцях, прысвечаных 90-й гадавіне заснавання Пінскай дыяцэзіі і семінарыі, 145-й гадавіне нараджэння яе першага арцыпастыра», — сказаў біскуп Антоні Дзям’янка.

(JM), (AG)