20 кастрычніка Святы Айцец Бэнэдыкт ХVI выказаў вялікі боль з прычыны тэрарыстычнага акту, які адбыўся 19 кастрычніка ў Бейруце і ў выніку якога загінула 8 чалавек і дзясяткі былі паранены. У спачувальнай тэлеграме ад імя Папы, накіраванай мараніцкаму Патрыярху Антыёхіі Бехара Раі, Дзяржсакратар Яго Святасці кардынал Тарчызіо Бэртонэ адзначыў, што Пантыфік рашуча асудзіў гэты акт насілля.

Як інфармуе Ватыканскае радыё, Папа просіць Бога «даць Лівану і ўсяму рэгіёну дар міру і згоды». Пантыфік выказвае глыбокае спачуванне пацярпелым і іх сем’ям і моліцца аб Божай дапамозе і суцяшэнні ў іх выпрабаваннях.

Ксёндз Фэдэрыка Ламбардзі, кіраўнік Залы Друку Апостальскай Сталіцы, назваў абсурдным забойства шматлікіх нявінных людзей. «Тэракт у Бейруце заслугоўвае рашучага асуджэння. Гэты бессэнсоўны гвалт не спрыяе мірнаму сужыццю ў Ліване», — адзначыў святар. Ксёндз Ламбардзі ўзгадаў словы Бэнэдыкта ХVI, які падчас нядаўнага апостальскага падарожжа ў гэтую краіну сказаў, што «Ліван пакліканы быць пасланнікам міру і надзеі для тых, хто там жыве, і для ўсяго рэгіёну». Кіраўнік ватыканскай прэс-службы выказаў надзею, што тэракт не стане нагодай да далейшага распаўсюджвання насілля ў Ліване.

(AG)