«Сікстынская капэла — калі сузіраць яе ў малітве — становіцца больш прыгожай, больш праўдзівай; адкрывае ўсё сваё багацце», — адзначыў Святы Айцец Бэнэдыкт XVI 31 кастрычніка на заканчэнне ўрачыстых Нешпараў, якія прайшлі ў капэле ў 500-годдзе адкрыцця ў ёй фрэсак — шэдэўраў працы Мікеланджэла. Папа падкрэсліў, што «капэла, па сваёй прыродзе, з’яўляецца літургічнай прасторай».

«Творы мастацтва, якія яе аздабляюць, асабліва цыкл фрэсак, у літургіі знаходзяць сваю жыццёвую прастору, кантэкст, у якім найлепшым чынам могуць выразіць усю сваю прыгажосць, багацце і шырокае значэнне», — заўважыў Пантыфік, чые словы прыводзіць Ватыканскае радыё. Бэнэдыкт XVI нагадаў, што свае фрэскі Мікеланджэла стварыў па просьбе папы Юлія ІІ у перыяд паміж 1508–1512 гг. Яны займаюць плошчу ў больш чым 1000 кв. м. «Можам уявіць сабе, якое ўражанне яны зрабілі на тых, хто стаў іх першымі сведкамі», — дадаў Святы Айцец.

Папа нагадаў словы гісторыка мастацтва Джорджыё Вазары, які назваў творы Мікеланджэла «святлом для ўсяго свету». Гаворка «не ідзе пра святло, якое паходзіць толькі ад разумнага выкарыстання насычаных і кантрастных колераў або руху, што ажыўляў мікеланджэлаўскі шэдэўр, але ад ідэі, якая прасякае ўсё вялікае скляпенне» і заключаецца ў тым, што «свет — гэта не прадукт цемры, выпадковасці, абсурду; ён паходзіць ад Розуму, Свабоды, найвышэйшага акту Любові».

«Гэтае Божае святло асвятляе фрэскі і ўсю Сікстынскую капэлу. Гэта святло, якое сваёй моцай перамагае хаос і цемру, каб дарыць жыццё: у стварэнні і адкупленні. І Сікстынская капэла апавядае гэтую гісторыю святла, вызвалення, збаўлення, апавядае аб адносінах Бога да чалавецтва», — адзначыў Святы Айцец.

(AG)