Мітрапаліт Кандрусевіч прывітаў удзельнікаў сімпозіума даследчыкаў Новага Запавету

Беларусь

03.09.2010 23:00

2 верасня 2010 г. у Мінску распачаўся V Усходнееўрапейскі сімпозіум даследчыкаў Новага Запавету. Арганізатарамі мерапрыемства з’яўляюцца Усходнееўрапейскі камітэт SNTS, Інстытут тэалогіі свв. Мяфодзія і Кірыла БДУ і Мінская духоўная акадэмія. Са сваім прывітальным словам да ўдзельнікаў сімпозіума падчас урачыстага адкрыцця канферэнцыі 3 верасня звярнуўся Мітрапаліт Мінска-Магілёўскі арцыбіскуп Тадэвуш Кандрусевіч. Канферэнцыя з’яўляецца пятай па ліку з шэрагу сімпозіумаў, прысвечаных развіццю супрацоўніцтва і абмену вопытам паміж праваслаўнымі, каталіцкімі і пратэстанцкімі даследчыкамі Новага Запавету. Папярэднія канферэнцыі адбываліся ў Румыніі (1998, 2000 гг.), Балгарыі (2001 г.), Расіі (2005 г.). На іх абмяркоўваліся пытанні новазапаветных даследаванняў, праблемы герменеўтыкі. Тэма сёлетняй сустрэчы — «Евангельскія вобразы Езуса Хрыста ў царкоўнай традыцыі і біблейскай навуцы». Форум закліканы наглядна прадэманстраваць функцыю біблеістыкі ў кантэксце сучаснай універсітэцкай навукі, а таксама як сацыяльную значнасць у сучаснай Еўропе. Арганізатары спадзяюцца, што сімпозіум стане важным крокам на шляху рэалізацыі сумесных міжнародных праектаў у вывучэнні Бібліі, а таксама дапаможа зацікаўленым беларускім грамадзянам паглыбіць свае веды пра тое, як трактуецца змест новазапаветных кніг у нашыя дні. 3 верасня 2010 г. адбылося ўрачыстае адкрыццё канферэнцыі, падчас якога з прывітальным словам да прысутных звярнуўся Мітрапаліт Мінска-Магілёўскі арцыбіскуп Тадэвуш Кандрусевіч, а таксама Мітрапаліт Мінскі і Слуцкі Філарэт, Патрыяршы Экзарх усяе Беларусі. Прапануем вашай увазе поўны тэкст прывітальнага слова Мітрапаліта Тадэвуша Кандрусевіча >>> «Кнігі Божага Адкрыцця вядомы і туды нельга нічога ні дадаць, ні адабраць, аднак іх неабходна даследаваць у святле Духа Святога і вучэння Касцёла», — адзначыў Мітрапаліт Тадэвуш Кандрусевіч.