Беларускія назарэтанкі на Кангрэсе ў Чэнстахове, «каталіцкі суботнік» па ініцыятыве біскупа Аляксандра Яшэўскага SDB, асвячэнне табліц «Magnificat» і «Benedictus» на Святой Зямлі і іншыя падзеі з жыцця Касцёла ў Беларусі за мінулы тыдзень.

Беларускія назарэтанкі прынялі ўдзел у Кангрэсе маладых кансэкраваных асобаў у Чэнстахове

Кангрэс праходзіў у межах святкавання Года кансэкраванага жыцця, які трывае ў Паўсюдным Касцёле.

23-26 верасня беларускія манахіні з Кангрэгацыi Сясцёр Найсвяцейшай Сям’і з Назарэта ўдзельнічалі ў ІІ Кангрэсе маладых кансэкраваных асобаў у Чэнстахове (Польшча). Сустрэча праходзіла пад назвай «Радасць кансэкрацыі» і была нагодай да таго, каб паказаць прыгажосць жыцця, прысвечанага выключна Богу.

«Каталіцкі суботнік» у магілёўскай парафіі арганізаваў біскуп Аляксандр Яшэўскі SDB

Святары і парафіяне гэтым разам аб’ядналіся не на малітве, а ў працы. Больш за тое, на дапамогу прыйшлі не толькі жыхары Магілёва, але і вернікі з іншых месцаў рэгіёна — Бабруйска, Касцюковіч, Горак, Чавусаў, Шклова, Фашчаўкі…

«Працоўны дэсант» католікаў Магілёўшчыны працаваў на тэрыторыі будынка па адрасе вул. Ленінская, 27. Гэты будынак плануецца прыстасаваць для душпастырскага цэнтра Каталіцкага Касцёла на Магілёўшчыне.

Слухачы катэхетычных курсаў і катэхеты Гродзенскай дыяцэзіі правялі сустрэчу ў Шчучыне

Сустрэча была арганізавана аддзелам адукацыі і выхавання Гродзенскай курыі. У ёй на пачатак новага катэхетычнага года прынялі ўдзел катэхеты і слухачы катэхетычных курсаў Гродзенскай дыяцэзіі.

Рэкалекцыі праводзіў а. Ян Асіповіч SP. Удзельнікі прызнаюцца, рэкалекцыі былі напоўнены не толькі тэматычнымі рэфератамі, але і ажыўленымі гутаркамі, пытаннямі і адказамі, спевамі пад гітару ля вогнішча.

4 беларусы сярод 20 тысяч удзельнікаў: беларуская дэлегацыя на Сусветнай сустрэчы сем'яў у Філадэльфіі

У амерыканскай Філадэльфіі прайшла Сусветная сустрэча сем’яў, у якой прынялі ўдзел і чатыры чалавекі з Беларусі.

Біскуп Пінскі і старшыня Рады па справах сям’і беларускага епіскапату Антоні Дзям’янка, сакратар Рады па справах сям’і а. Пётр Фраштэнга OCD і сямейная пара Андрэя і Наталлі Пан сталі ўдзельнікамі сёлетняга форуму, які прайшоў пад дэвізам «Любоў – нашае пакліканне. Сям’я, якая жыве ў паўнаце».

Сусветная сустрэча сем’яў праводзіцца раз на тры гады. Мінулы раз сем’і з усяго свету збіраліся ў Мілане (Італія).

Першая пастырская сустрэча святароў на чале з біскупам Аляксандрам Яшэўскім SDB прайшла ў Магілёве

У магілёўскай парафіі Унебаўзяцця Найсвяцейшай Панны Марыі адбылася пастырская сустрэча каталіцкага духавенства ўсходняй часткі Мінска-Магілёўскай архідыяцэзіі. Сустрэча пачалася духоўнай канферэнцыяй, якую падрыхтаваў духоўны айцец Магілёўскай часткі архідыяцэзіі кс. Андрэй Далянскі. Святар засяродзіўся на тэме духоўнай і чалавечай салідарнасці.

«Канешне, мы прагнем, каб Магілёўшчына стала “райскім садам”. Але варта памятаць, што гэта будзе немагчыма, калі паміж намі, святарамі гэтай зямлі, не будзе святарскай еднасці і салідарнасці – духоўнай і чалавечай», — заўважыў святар.

Беларускія католікі здзейснілі IV Нацыянальную пілігрымку на Святую Зямлю

Пілігрымка была абвешчана Нацыянальнай і яе вынікам стала ўсталяванне на Святой Зямлі табліц «Magnificat» і «Benedictus». У малітоўным падарожжы па слядах Хрыста прыняло ўдзел каля 300 чалавек.

За сем дзён пілігрымы наведалі асноўныя месцы Святой Зямлі, звязаныя з жыццём і дзейнасцю Хрыста, сярод якіх Ерузалем, Бэтлеем, Ерыхон, гара Табор, Капернаум, Галілейскае возера, Поле пастухоў, Кана Галілейская, Мёртвае мора, рака Ярдан і інш.

«Цяпер, калі я пабачыла апісаныя ў Бібліі месцы на свае вочы, я паверыла да такой ступені, што не расказаць», — прызнаецца адна з удзельніц пілігрымкі.

25 гадоў у Воранаве працуюць айцы палатыны

«Усё для бясконцай Хвалы Божай...» 25-годдзе душпастырскай службы ў парафіі Святых апосталаў Сымона і Юды Тадэвуша ў Воранаве адзначаюць айцы палатыны.

Манаская супольнасць палатынаў працуе ў многіх краінах свету. У Беларусі акрамя Воранава святары гэтай супольнасці служаць у Германішках, Бярозе, Жлобіне, Талачыне і Мінску.

Аўтамабіль Папы Францішка праехаў у непасрэднай блізкасці ад беларускіх удзельнікаў Сусветнай сустрэчы сем’яў у Філадэльфіі

Cерыю здымкаў са Святым Айцом паспеў зрабіць а. Пётр Фраштэнга OCD, сакратар Рады па справах сям’і беларускага епіскапату, які ў складзе беларускай дэлегацыі прымаў удзел у Сусветнай сустрэчы сем’яў, падчас якой з удзельнікамі сустрэўся Папа Францішак.

На Святой Зямлі асвечаны табліцы «Magnificat» і «Benedictus» з тэкстам на беларускай мове

Дзве табліцы на беларускай мове — славуты гімн «Magnificat», які часта называюць «Песняй Марыі», а таксама гімн «Benedictus», праспяваны Захарыем пасля звесткі пра нараджэнне доўгачаканага сына, — былі асвечаны 26 верасня на Святой Зямлі.

Табліцы з тэкстам на беларускай мове папоўнілі прысутнасць Касцёла ў Беларусі і беларускай культуры на Святой Зямлі. У мінулыя гады там асвячалі табліцу з тэкстам малітвы «Ойча наш» на беларускай мове, а таксама мазаіку Маці Божай Будслаўскай.

Мітрапаліт Тадэвуш Кандрусевіч расказаў, як напужаў службу аховы ў Дэнверы

Распавядаючы ў інтэрв’ю Catholic.by пра пілігрымкі ў сваім жыцці, Мітрапаліт Мінска-Магілёўскі арцыбіскуп Тадэвуш Кандрусевіч узгадаў цікавы выпадак, які адбыўся з ім на пачатку 90-х у Дэнверы (ЗША).

«У Дэнверы ў 1993 годзе праходзіла сустрэча моладзі, на якую павінен быў прыехаць Папа Рымскі. Як біскуп я адказваў за катэхезу для рускамоўнай групы. Нашы заняткі праходзілі ў прыгарадзе, а наступны пункт праграмы павінен быў пачынацца ў самім Дэнверы — а гэта каля 20 км ад нас. Я прапанаваў ісці ў Дэнвер пешшу, і… моладзь згадзілася.

Было горача, але мы пайшлі. Ужо на месцы сустрэчы з Янам Паўлам ІІ, убачыўшы мяне, служба аховы дзівілася: «Біскуп? Адкуль узяўся?» Я і кажу: прыйшоў пешшу. Яны не паверылі, бо біскупы зазвычай прыязджалі ў горад на асобным аўтобусе, абсталяваным кандыцыянерамі.

Людзі са службы аховы не маглі паверыць, што я — біскуп — прыйшоў пешшу. Яны выклікалі хуткую, паклалі мяне на каталку і пачалі мерыць ціск. Пасля ледзьве адпусцілі (смяецца — заўв. аўт.)».

Ілья Лапато