29 ліпеня 2012 г. парафія Св. Міхала Арханёла ў Міхалішках (Астравецкі дэканат) перажывала ўрачыстасць св. Ганны — адной з апекуноў святыні, Маці Найсвяцейшай Панны Марыі. Вернікі касцёла св. Міхала і іншых парафій сабраліся, каб агарнуць сваімі малітвамі ўсіх пажылых людзей, хворых, бабуль і дзядуляў.

Святую Імшу ўзначаліў кс. Юрый Марціновіч. У гаміліі святар распавёў пра жыццё св. Ганны і ўказаў на цноты святых, у якіх трэба «вучыцца жыццю, заснаванаму на хрысціянскіх каштоўнасцях». Ксёндз Марціновіч падкрэсліў таксама актуальнасць паслання, якое сёння нясе ўсім святая Ганна.

Сёння святая асаблівым чынам прамаўляе «прыкладам сваёй чысціні і нявіннасці да ўсіх жанчын, маці і жонак», прамаўляе і «да ўсіх мужчын і бацькаў, каб яны супольна, праз павагу, разуменне, давер, клопат, любоў і сям’і імкнуліся да святасці, як гэта рабілі бацькі Найсвяцейшай Маці, і разам дасягнулі хвалы неба».

У іканаграфіі святая Ганна прадстаўлена як жанчына, што вучыць маленькую Марыю чытаць Пісанне. На абразах Марыя ўважліва слухае сваю маці, паслухмяная і пакорная ёй. Па словах кс. Марціновіча, гэта прыклад для дзяцей і моладзі: яны «павінны шанаваць і цаніць сваіх бацькоў, апекуноў, настаўнікаў, выхавацеляў, паўтараючы за св. Паўлам: ва ўсім слухаць бацькоў, бо гэта падабаецца Пану» (пар. Кал 3, 20). Дзеці, дадаў святар, павінны дзякаваць бацькам і памятаць пра іх у малітве.

Парафіяльны касцёл у Міхалішках — старадаўняя святыня ў стылі барока, пабудаваная ў 1653 г. У 2013 г. будзе адзначацца 360-гадовы юбілей святыні.

Кс. Юрый Марціновіч