6 чэрвеня 2010 г. па цэнтральных вуліцах Мінска адбылася працэсія Божага Цела. Усё духавенства сталіцы, сёстры законныя і шматлікія вернікі, ідучы за Езусам эўхарыстычным да чатырох алтароў, публічна сведчылі сваю веру.

Супольная малітва па традыцыі распачалася з цэлебрацыі святой Імшы каля касцёла Найсвяцейшай Тройцы (святога Роха) на Залатой Горцы, якую ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч.

«Сённяшняе свята, — адзначыў у гаміліі арцыпастыр, — гэта таксама добрая нагода лепш зразумець сакрамэнт Эўхарыстыі і паклапаціцца пра належнае яго ўшанаванне і прыняцце. Бо, як вучыць святы апостал Павел, нягоднае прыняцце гэтага сакрамэнту жыцця можа прынесці супрацьлеглы эфект. Той, хто нягодна есць Цела Хрыста і п’е Ягоную Кроў, той есць і п’е на сваё асуджэнне».

Поўны тэкст гаміліі >>>

Адметнасцю сёлетняга шэсця стала малітва за ўсіх, хто змагаўся дзеля будучыні Айчыны ў гады Вялікай Айчыннай вайны, 65-годдзе перамогі якой адзначалася ў маі гг. Сімвалічна, што малітва гэтая адбывалася на плошчы Перамогі перад вечным агнём.

Наступныя тры стацыі сабралі ўдзельнікаў працэсіі на Кастрычніцкай плошчы, на плошчы Незалежнасці каля Чырвонага касцёла і на плошчы Свабоды перад архікатэдрай.

Падчас кожнай стацыі манстранцыя з Найсвяцейшым Сакрамэнтам змяшчалася на прыгожа аздобленым троне, падрыхтаваным вернікамі пэўных парафій, зачытваўся ўрывак з Евангелля, а затым святар прамаўляў гамілію. Падчас кожнай стацыі прысутным удзялялася благаслаўленне Найсвяцейшым Сакрамэнтам.

Перад заключным благаслаўленнем вернікі праспявалі гімн «Te Deum» («Цябе, Бога, праслаўляем»). Завяршыў урачыстасць спеў гімна «Магутны Божа».

У працэсіі прымалі ўдзел дзеці мінскіх парафій, якія сёлета прынялі Першую святую Камунію, а таксама прадстаўнікі розных малітоўных груп і рухаў.