Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Разам будаваць Божае Валадарства: Мітрапаліт Кандрусевіч асвяціў вуглавы камень пад будаўніцтва касцёла ў Магілёве
Беларусь - Мінска-Магілёўская архідыяцэзія
17.06.2012 18:55

17 чэрвеня 2012 г. у Магілёве адбылося асвячэнне вуглавога каменя пад будаўніцтва касцёла св. Антонія. Асвячэнне здзейсніў Мітрапаліт Мінска-Магілёўскі арцыбіскуп Тадэвуш Кандрусевіч.

У гаміліі арцыпастыр адзначыў, што асвячэнне вуглавога каменя — «знак таго, што ў старажытным горадзе над Дняпром паволі з’яўляецца яшчэ адно месца спаткання чалавека з Богам». «Будуецца новы касцёл, адначасова пры гэтым будуецца і жывы Касцёл як народ Божы, якім вы з’яўляецеся», — падкрэсліў Мітрапаліт.

Іерарх прапанаваў вернікам паразважаць над евангельскім урыўкам гэтага дня, у якім Хрыстус распавядае прытчу аб сейбіце і гарчычным зерні. «З малога насення вырастае вялікі ўраджай. Падобна і ў жыцці чалавека. Малыя акты вядуць да вялікіх вынікаў. Нездарма кажуць, што замест таго, каб праклінаць цемру, лепш запаліць свечку. Акты любові да бліжняга, прабачэнне і бескарысная дапамога могуць учыніць вельмі шмат, калі не адразу, то на працягу часу», — адзначыў Мітрапаліт.

Будаванне Божага Валадарства, па словах арцыпастыра, падобна да малога зерня, якое сейбіт кідае ў зямлю. Божае Валадарства пакліканы будаваць усе вернікі, «бо мы ўсе належым да Касцёла як Містычнага Цела Хрыста».

«Сёння асвячаецца вуглавы камень, што нагадвае пра ажыццяўленне будаўніцтва матэрыяльнай святыні з мэтай у яе сценах будаваць Божае Валадарства, — працягваў Мітрапаліт. — Валадарства Божае — гэта Валадарства, збудаванае на моцным падмурку, якім ёсць Хрыстус, і з моцнага матэрыялу, якім з’яўляюцца сапраўдныя вернікі».

Іерарх заклікаў магілёўскіх вернікаў «з надзеяй на паспяховае будаўніцтва новага касцёла ісці ў гэтае жыццё і праз вернасць у малых справах будаваць вялікае Валадарства Божае».

Напрыканцы святой Імшы адбылося ўшанаванне рэліквій св. Антонія — апекуна парафіі.

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме