5 кастрычніка 2012 г. пачалася перэгрынацыя копіі цудоўнага абраза Маці Божай Будслаўскай па парафіях нашай краіны. У гэты дзень адбылося ўнясенне копіі абраза ў мінскую архікатэдральную парафію Імя Найсвяцейшай Панны Марыі.

Перад святой Імшой Мітрапаліт Мінска-Магілёўскі арцыбіскуп Тадэвуш Кандрусевіч, святары і вернікі сустрэлі копію абраза ля ўваходу ў катэдру. Ва ўрачыстай працэсіі яна была ўнесена ў касцёл. Затым Мітрапаліт звярнуўся ў малітве да Маці Божай Будслаўскай, адзначыўшы: «З бязмежным даверам аддаем табе ў апеку нас саміх, нашы сем’і, парафіі, дыяцэзіі». Усе вернікі прамовілі малітву «Тваёй абароне аддаемся».

Святую Імшу ўзначаліў Мітрапаліт Кандрусевіч. У літургіі ўдзельнічалі Апостальскі візітатар для грэка-католікаў у Беларусі архімандрыт Сяргей Гаек, Генеральны вікарый Мінска-Магілёўскай архідыяцэзіі кс. прэлат Андрэй Стэцкевіч, кусташ Нацыянальнага санктуарыя Маці Божай у Будславе а. Віктар Бурлака, святары архідыяцэзіі.

У гаміліі Мітрапаліт адзначыў, што сённяшнім набажэнствам распачынаецца перэгрынацыя копіі цудоўнага абраза Маці Божай Будслаўскай па парафіях Беларусі. Гэтым, па словах арцыпастыра, мы хочам падрыхтавацца да вялікага юбілею — 400-годдзя прыбыцця абраза ў Будслаў, і да Года веры, які пачнецца ў хуткім часе. «Цяпер гэты абраз прыходзіць у вялікай агульнабеларускай пілігрымцы, каб умацаваць нашу веру», — падкрэсліў іерарх.

Мітрапаліт заахвоціў прысутных маліцца аб тым, каб «перэгрынацыя прынесла як мага больш духоўных плёнаў для нас, нашых сем’яў, парафій і дыяцэзій».

«Словамі сённяшняга Евангелля аб Звеставанні вітаем цябе, Марыя, якая ў копіі цудоўнага абраза Маці Божай Будслаўскай распачынаеш перэгрынацыю па парафіях нашай краіны. Вітаем цябе ў мінскай архікатэдры, якая прысвечана твайму Імені. Вітаем напярэдадні распачацця Года веры», — з такімі словамі арцыбіскуп Кандрусевіч звярнуўся да Маці Божай.

Сённяшні ўрывак з Евангелля, як адзначыў Мітрапаліт, прадстаўляе сцэну Звеставання, з якой пачалася «новая эра ў гісторыі чалавецтва — эра збаўлення». Дзякуючы згодзе Марыі «ў гісторыю ўвайшоў Збаўца», і «нарэшце ў канцы цёмнага тунэлю, у якім чалавецтва знаходзілася пасля граху Адама, з’явілася святло». Такім чынам, Звеставанне Найсвяцейшай Панне Марыі — гэта, дадаў арцыпастыр, «дазвол, каб сонца, якім з’яўляецца Езус Хрыстус і якое ніколі не заходзіць, заззяла для кожнага чалавека». Згода Марыі з Божай воляй «ажыццявіла мару чалавецтва аб пераходзе з грахоўнай ночы ў дзень Божага святла».

«Сёння Марыя ў копіі цудоўнага абраза Маці Божай Будслаўскай прыходзіць да нас. Марыя з’яўляецца найкарацейшым і найпаўнейшым шляхам да Езуса», — працягваў іерарх. Мітрапаліт дадаў, што перэгрынацыя абраза — «вялікая ласка і адначасова заданне, каб належным чынам выкарыстаць гэтую візітацыю Панны Марыі».

Арцыпастыр нагадаў пра крызіс, у якім знаходзіцца сучасны свет, дзе «чалавек займае месца Бога, забываючыся аб тым, што не ён стварыў Бога, але Бог — яго», і «нараджаецца новая, спрэчная з Евангеллем і годнасцю чалавечай асобы культура». У сённяшнім чытанні, як адзначыў Мітрапаліт, мы бачым д’ябла пераможаным, але ў наш час «д’ябал не спіць і, як рыклівы леў, ходзіць, шукаючы, каго праглынуць». «Нам трэба звяртацца да Марыі, якая вядзе нас да свайго Сына, каб з Яго дапамогай не трапіць у сеткі злога духа і яго перамагчы», — падкрэсліў іерарх.

Поўны тэкст гаміліі тут>>>

«Дапамажы нам жыць нашай верай, прывядзі нас да свайго Сына, каб наш народ заўсёды заставаўся верным свайму хрысціянскаму пакліканню», — звярнуўся ў малітве арцыбіскуп Кандрусевіч да Найсвяцейшай Панны.

Напрыканцы святой Імшы Мітрапаліт падзякаваў Богу за ласку гэтай візітацыі копіі цудоўнага абраза Маці Божай у мінскую архікатэдру. Таксама арцыпастыр выказаў падзяку кусташу будслаўскага санктуарыя а. Віктару Бурлаку, усім, хто дапамагаў у падрыхтоўцы гэтага набажэнства, і ўсім прысутным. Іерарх нагадаў, што 11 кастрычніка папа Бэнэдыкт ХVI распачне ў Рыме Год веры, а таксама пра свой удзел у Сінодзе Біскупаў па новай евангелізацыі, які пачнецца 7 кастрычніка. Арцыбіскуп папрасіў вернікаў аб малітве.

Затым адбылося благаслаўленне копіі абраза і прагучала малітва прысвячэння архікатэдральнай парафіі Маці Божай. Пасля распачалася малітва Ружанца.

Копія абраза Маці Божай Будслаўскай будзе прабываць у мінскай архікатэдры да 14 кастрычніка.

Анастасія Грышан