Існуе меркаванне, што самую першую батлейку прыдумаў у XIII стагоддзі святы Францішак Асізскі, які прыходзіў з братамі-манахамі ў хлеў да аслоў і кароваў спяваць калядныя спевы, услаўляючы нованароджанага Збаўцу. Пазней з’явіліся разбяныя драўляныя батлейкі са статычнымі сцэнамі Раства Хрыстова (яны зваліся прэзэпе), якія ўсталёўвалі ў каталіцкіх святынях Заходняй Еўропы і на пляцах буйных гарадоў.

Сёлета ў парафіі Святога Казіміра ў Маладзечне адбыўся конкурс на лепшую батлейку. На працягу ўсяго Адвэнту дзеці разам са сваімі бацькамі сваімі рукамі стваралі стаенкі. Яны былі з рознага матэрыялу: з паперы, драўляныя, з пенапласту, мадэліны, пластыліна і г.д.

Конкурс пацвердзіў, што такая супольная праца ўсіх членаў сям’і яшчэ больш спрыяе і пашырае атмасферу адзінства, узаемапаразумення, супрацоўніцтва, цяпла і любові ў сем’ях.

Кожны ўдзельнік конкурсу атрымаў заслужаныя ўзнагароды: салодкі пачастунак і апладысменты.

Энцыклапедычная даведка: батлеечная кампазіцыя — прайграванне сцэны Каляд з выкарыстаннем аб’ёмных постацяў ці фігурак, выкананых з рознага матэрыялу. У каталіцкіх краінах менавіта такая батлейка атрымала найбольшае распаўсюджанне.

С. Уладзіміра MSF