Папа Францішак скіраваў пасланне землякам бл. Яна ХХІІІ — жыхарам італьянскага рэгіёна Бергама і ў прыватнасці горада Сота-іль-Монтэ, у якім нарадзіўся будучы святы. Зварот Пантыфіка быў апублікаваны ў мясцовым выданні «Рэха Бергама», з якім супрацоўнічаў Ян ХХІІІ, яшчэ будучы звычайным святаром.

«Я шчаслівы абвясціць аб святасці Яна Паўла ІІ — вялікага чалавека і Папы», — прызнаўся Святы Айцец ў відэапасланні да народу Польшчы, трансляцыя якога прайшла вечарам 24 красавіка на першым канале Польскага тэлебачання і Польскім радыё з нагоды кананізацыі Пантыфіка.

24 красавіка Святы Айцец Францішак прыняў на аўдыенцыі ў Ватыкане прэм’ер-міністра Рэспублікі Албанія Эдзі Рама. Пасля сустрэчы з Пантыфікам прайшла размова палітыка з кардыналам дзяржсакратаром П’етра Паралінам, якога суправаджаў арцыбіскуп Дамінік Мамбэрці, сакратар па адносінах Святога Пасаду з дзяржавамі.

Мы асцерагаемся блізкасці Езуса, таму што яна дае нам радасць. Толькі так можна патлумачыць, чаму ёсць шмат хрысціянаў «пахавальных», чыё жыццё здаецца пастаянным пахаваннем. Яны аддаюць перавагу смутку, а не радасці. Лепш адчуваюць сябе не ў свеце радасці, але ценю, як тыя жывёлы, якія выходзяць толькі ноччу, а не на святло дня, калі нічога не бачаць, як кажаны.

У канцы агульнай аўдыенцыі 23 красавіка Папа Францішак выказаў салідарнасць з працаўнікамі металургічнага камбіната «Lucchini» у італьянскім П’ёмбіна, які знаходзіцца на стадыі закрыцця.

«Чаму ты, што замыкаешся ў сабе пасля паразы і не маеш больш сіл, каб маліцца, шукаеш жывога сярод мёртвых? Чаму ты, што адчуваеш сябе адзінокім, пакінутым сябрамі, і, магчыма, нават Богам, шукаеш жывога сярод мёртвых? Чаму ты, што страціў надзею, і ты, які адчуваш сябе ў пастцы сваіх грахоў, шукаеш жывога паміж мёртвых? Чаму ты, што імкнешся да прыгажосці, да духоўнай дасканаласці, справядлівасці і міру шукаеш жывога сярод мёртвых?»

Дазволіць, каб радаснае здзіўленне пасхальнай нядзелі выпраменьвалася ў думках, позірках, паводзінах, жэстах і словах, заклікаў Папа Францішак вернікаў 21 красавіка падчас малітвы «Уладарка неба», якая ў пасхальны перыяд замяняе традыцыйны «Анёл Панскі». Памаліцца супольна са Святым Айцом сабралася вялікая колькасць пілігрымаў з Італіі і іншых краін свету.

Бяздомныя Рыма атрымалі велікодныя падарункі ад Святога Айца Францішка. Іх перадаў Папскі элемазінарый арцыбіскуп Конрад Краеўскі.

Вярнуцца, каб сустрэцца з Хрыстом, заклікаў Папа Францішак падчас літургіі пасхальнай вігіліі, якую ўзначаліў у базыліцы св. Пятра вечарам 19 красавіка 2014 г. Падчас яе Святы Айцец удзяліў сакрамэнт хросту дзесяці асобам, у тым ліку адной беларусцы Юліі Дземянчук.

20 красавіка пасля велікоднай  Імшы на плошчы св. Пятра Папа Францішак звярнуўся да вернікаў з балкона цэнтральнай лоджыі ватыканскай базылікі з традыцыйным благаслаўленнем “Urbi et Orbi” (Гораду і свету).

Каля 40 тысяч чалавек з розных краін, у тым ліку дзеці і хворыя, прынялі ўдзел у набажэнстве Крыжовага шляху ў рымскім Калізеі ў Вялікую пятніцу 18 красавіка. Набажэнства ўзначаліў Папа Францішак, разважанні былі падрыхтаваны італьянскім арцыбіскупам Джанкарло Брэганціні і былі прысвечаны ранам сучаснага свету: сацыяльным наступствам эканамічнага крызісу, драмам эмігрантаў, жанчын, якія сталі ахвярамі насілля, зняволеных.

Пацыенты ватыканскай дзіцячай клінікі “Bambino Gesu” атрымалі салодкія падарункі ад Святога Айца Францішка з нагоды велікодных святаў. Папа перадаў для іх 150 шакаладных яек, якія з’яўляюцца традыцыйным велікодным ласункам у Італіі.

Зняволеныя рымскай турмы “Regina Caeli” атрымалі ад Святога Айца Францішка каля 1000 кніг, якія ўключаюць чатыры Евангеллі і Дзеі Апосталаў. Іх перадаў Папскі элемазінарый арцыбіскуп Конрад Краеўскі. “Гэта была ўзрушваючая і кранаючая сустрэча. Многія зняволеныя плакалі, адчуваючы любоў Пантыфіка”, - падзяліўся іерарх на заканчэнне візіту ў турму і адзначыўшы, што многія зняволеныя дзяліліся сваімі цяжкасцямі, апавядалі пра патрэбы і запрасілі Святога Айца наведаць іх.

Езус стаў слугой і пакінуў нам у спадчыну заданне “служыць адзін аднаму” ў любові - гэтая думка была ў цэнтры гаміліі Папы Францішка вечарам 17 красавіка падчас Імшы Вячэры Пана. Святы Айцец узначаліў літургію ў рымскім рэабілітацыйным цэнтры “Santa Maria della Provvidenza”, падчас яе абмыўшы ногі 12 асобам розных узростаў, нацыянальнасцяў і веравызнанняў.

17 красавіка Папа Францішак цэлебраваў у базыліцы св. Пятра Імшу Хрызму ў інтэнцыі ўсіх святароў у свеце. У цэнтры гаміліі Пантыфіка была тэма радасці святароў, якая з’яўляецца каштоўным дарам не толькі для іх саміх, але і для ўсяго Божага народа, сярод якога яны пакліканы быць намашчанымі і да якога былі пасланы, каб намашчаць.