«У Касцёле існуюць аспекты негатыўныя і цяжкія, бо ён вельмі чалавечы. Аднак мы павінны цешыцца з таго, што належым да Касцёла, што з’яўляемся Касцёлам, і павінны бачыць, што праўда мацнейшая за хлусню», — падкрэсліў Святы Айцец Бэнэдыкт XVI падчас сустрэчы з духавенствам дыяцэзіі Рыма 10 сакавіка 2011 г. Па традыцыі Папа сустрэўся са святарамі Вечнага Горада ў пачатку Вялікага посту.

Як адзначыў Пантыфік падчас сустрэчы, святар абіраецца Духам Святым і павінен глядзець на ўсе справы ў Божай перспектыве. Папа прапанаваў прысутным паразважаць над паняццем «пастыр», якое першапачаткова азначала «кароль». Затым Святы Айцец нагадаў аб задачах святара, асабліва аб «служэнні». У гэтым кантэксце, падкрэсліў Бэнэдыкт XVI, кожны святар павінен быць слугой, гэта значыць дазволіць ускласці на сябе цяжар Пана, а не ісці за сваімі схільнасцямі.

«Усе мы, ад дыякана да Папы, пакліканы чыніць рэчы, якія ў нас не заўсёды атрымліваюцца, бо яны духоўныя і нам не адпавядаюць, але гэта частка таго, што наказвае нам Пан для Касцёла, а мы павінны даць Касцёлу тое, чаго ён ад нас чакае», — падкрэсліў Пантыфік, звяртаючыся да рымскага духавенства.