29 сакавіка, у Вялікую пятніцу, папа Францішак узначаліў у базыліцы св. Пятра ў Ватыкане набажэнства Мукі Пана. «Вялікая пятніца, якую перажываем у Год веры з новым Наступнікам Пятра, можа стаць пачаткам новага жыцця», — адзначыў у гаміліі прапаведнік Папскага дома айцец Раньера Канталамеса.

У адпаведнасці з традыцыяй гамілію ў гэты дзень прамаўляў не Пантыфік, а прапаведнік Папскага дома. Па словах святара, сёння магчыма «прыняць найважнейшае рашэнне свайго жыцця: паверыць, што Езус памёр за нашы грахі і ўваскрос для таго, каб нас апраўдаць». Гэта азначае, што ў Хрысце памерлым і ўваскросшым свет дасягнуў сваёй канчатковай мэты, зло і смерць былі назаўсёды пераможаны, хоць гэтага і не бачаць яўна чалавечыя вочы.

Айцец Канталамеса дадаў, што праз адкупленне, якое здзейсніў Хрыстус, пачаўся новы свет — новае неба і новая зямля.

Прапаведнік Папскага дома закрануў таксама тэму евангелізацыі, якая, па яго словах, з’яўляецца не прапагандай, але Божым дарам для свету, каб Божае жыццё ажыўляла ўсіх.

«Гэта ўжо 34-я Вялікая пятніца, калі я прамаўляю гамілію на літургіі Мукі Пана, якую цэлебруе Папа, — адзначыў святар у размове з Ватыканскім радыё. — Але, шчыра кажучы, я хацеў бы замаўчаць, бо гэты Папа адзіным жэстам і двума словамі здольны сказаць больш, чым я ва ўсёй сваёй гаміліі».

Падчас набажэнства Мукі Пана адбылася адарацыя крыжа, выстаўленага перад галоўным алтаром базылікі. Літургія завяршылася святой Камуніяй.

(AG)