Сучасная секулярызацыя паходзіць з падзелу заходняга хрысціянства ў XVI ст., калі рэлігія стала лічыцца прыватнай справай чалавека, — лічыць старшыня Папскай рады спрыяння хрысціянскаму адзінству кардынал Курт Кох. Іерарх адзначыў, што сёння важна памятаць пра негатыўныя з’явы Рэфармацыі, 500-годдзе якой будзе адзначацца ў хуткім часе.

Па словах кардынала, да еднасці з лютэранамі яшчэ далёка. Найбольшай праблемай застаецца сама канцэпцыя Касцёла ў пратэстантаў. Каб знішчыць гэтую перашкоду, неабходны, як падкрэсліў старшыня Папскай рады, сур’ёзны тэалагічны дыялог.

Кардынал Кох разам з тым не выключае больш кароткага шляху да адзінства ў выглядзе, напрыклад, стварэння ардынарыяту для лютэран або структуры, падобнай да той, якую атрымалі ў Касцёле былыя англікане. Іерарх дадаў, што гэтая ініцыятыва павінна паходзіць ад саміх лютэран, калі б яны пажадалі перайсці ў Каталіцкі Касцёл, захаваўшы свае традыцыі і звычаі.

У размове з агенцтвам Zenit кардынал звярнуў увагу таксама на інтэрпрэтацыю Другога Ватыканскага Сабору. Іерарх нагадаў, што Святы Айцец Бэнэдыкт XVI вучыць разумець Сабор у лучнасці з усёй Традыцыяй Касцёла.

(AG)