Разважанні да Крыжовага шляху, які адбудзецца ў Апостальскай Сталіцы ў Вялікую пятніцу, у гэтым годзе падрыхтуе мараніцкі Патрыярх Бехара Раі і ліванская моладзь. Гэтае набажэнства штогод узначальвае Папа.

25 студзеня папа Бэнэдыкт XVI узначаліў нешпары ў базыліцы святога Паўла за мурамі на заканчэнне Тыдня малітваў аб адзінстве хрысціянаў. У малітве прынялі ўдзел прадстаўнікі Праваслаўнай Царквы, пратэстанцкіх Цэркваў, Міжнароднай змешанай камісіі па тэалагічным дыялогу паміж Касцёлам і Праваслаўнай Царквой.

21 студзеня, ва ўспамін св. Агнешкі, Пантыфіку прадставілі ягнят, з воўны якіх пасля будуць сатканы паліі — адзнакі для асабліва ўганараваных іерархаў Касцёла.

6 студзеня, ва ўрачыстасць Аб’яўлення Пана, падчас ранішняй літургіі Святы Айцец Бэнэдыкт XVI удзеліць біскупскую сакру святарам, сярод якіх — асабісты сакратар Пантыфіка і прэфект Папскага дома кс. прэлат Георг Генсвайн.

Нешпарамі з удзелам Святога Айца завяршыўся ў Апостальскай Сталіцы 2012 год. У гаміліі Папа звярнуў увагу на значэнне гімна «Te Deum», які прагучаў падчас гэтай урачыстасці.

Як i кожны месяц, на студзень 2013 года Святы Айцец Бэнэдыкт XVI давярае малітвам вернікаў дзве інтэнцыі: агульную і місійную. Першая з іх датычыць клопату Пантыфіка аб паглыбленні веры і асабістага знаёмства вызнаўцаў Хрыста са сваім Богам.

Пра тое, што хрысціяне павінны прытрымлівацца прыкладу Езуса ў пабудове міру ва ўсім свеце, нагадаў Папа падчас святой Імшы ў вігілію Божага Нараджэння, у базыліцы св. Пятра. Таксама Пантыфік заклікаў да міру на Святой Зямлі, што асабліва актуальна для горада, дзе нарадзіўся Хрыстус, Бэтлеема. У літургіі ў Ватыкане ўдзельнічалі 10 тысяч вернікаў.

16 снежня Святы Айцец Бэнэдыкт XVI наведаў рымскую парафію Св. Патрыцыя, дзе сустрэўся з вернікамі і ўзначаліў літургію. У гаміліі Пантыфік нагадаў пра радасць, якая прысутнічае ў Адвэнце і натхняе ўвесь час падрыхтоўкі да Божага Нараджэння і крыніца якой, па словах Папы, — трывалае пачуццё прысутнасці Збаўцы сярод нас.

Прадстаўлена праграма набажэнстваў перыяду Божага Нараджэння, якія ўзначаліць Святы Айцец Бэнэдыкт XVI. Папа будзе цэлебраваць Імшу ў вігілію Нараджэння Пана, 25 снежня ўдзеліць благаслаўленне «Urbi et Orbi», ва ўрачыстасць Аб’яўлення Пана ўдзеліць біскупскую сакру, а 13 студзеня ахрысціць дзяцей.

«Няхай новы літургічны год, які распачынаецца, будзе для вас шляхам, на якім вы зможаце перажыць вернасць Богу», — пажадаў Святы Айцец Бэнэдыкт XVI студэнтам Рыма. Пантыфік сустрэўся з моладдзю на Нешпарах 1 снежня ў ватыканскай базыліцы.

Як і кожны месяц, Святы Айцец давярае малітвам вернікаў дзве інтэнцыі: агульную і місійную. На снежань першая з іх — «каб ва ўсім свеце мігрантаў прымалі, асабліва ў хрысціянскіх супольнасцях, з велікадушнасцю і сапраўднай любоўю». Другая інтэнцыя — «каб Хрыстус аб’явіўся ўсяму чалавецтву як святло, якое паходзіць з Бэтлеема і адбіваецца на абліччы Яго Касцёла».

24 лістапада ў базыліцы св. Пятра за мурамі ў Ватыкане адбылася кансісторыя, падчас якой Святы Айцец надаў кардынальскую годнасць шасці іерархам. У гаміліі Папа падкрэсліў, што місія Хрыста «арыентавана на ўсяго чалавека і кожную асобу, пераўзыходзячы любыя этнічныя, нацыянальныя і рэлігійныя асаблівасці».

Кожны месяц Святы Айцец даручае малітвам вернікаў дзве інтэнцыі: агульную і місійную. У лістападзе агульная інтэнцыя Папы наступная: «Каб біскупы, святары і ўсе слугі Евангелля давалі адважнае сведчанне вернасці ўкрыжаванаму і ўваскросламу Пану».

3 лістапада Святы Айцец Бэнэдыкт XVI узначаліў Імшу за кардыналаў і біскупаў, якія памерлі на працягу мінулага года. Літургія адбылася ў базыліцы св. Пятра з удзелам шматлікіх іерархаў, святароў і вернікаў.

«Сікстынская капэла — калі сузіраць яе ў малітве — становіцца больш прыгожай, больш праўдзівай; адкрывае ўсё сваё багацце», — адзначыў Святы Айцец Бэнэдыкт XVI 31 кастрычніка на заканчэнне ўрачыстых Нешпараў, якія прайшлі ў капэле ў 500-годдзе адкрыцця ў ёй фрэсак — шэдэўраў працы Мікеланджэла. Папа падкрэсліў, што «капэла, па сваёй прыродзе, з’яўляецца літургічнай прасторай».

21 кастрычніка Святы Айцец Бэнэдыкт ХVI узначаліў на плошчы перад ватыканскай базылікай Імшу, падчас якой кананізаваў семярых благаслаўлёных. Гэтая кананізацыя была першай і адзінай у бягучым годзе і 10-й у Пантыфікаце гэтага Папы. Сярод новых святых — два святары, дзве законніцы і трое свецкіх вернікаў.

21 кастрычніка, у нядзелю, Святы Айцец кананізуе семярых благаслаўлёных. Гэтая кананізацыя стане першай і адзінай у бягучым годзе і 10-й у Пантыфікаце Бэнэдыкта XVI. Сярод будучых святых — два святары, дзве сястры законныя і трое свецкіх вернікаў.

З удзелам тысяч вернікаў 11 кастрычніка на плошчы Св. Пятра ў Ватыкане адбылася святая Імша пад кіраўніцтвам папы Бэнэдыкта XVI, якой распачаўся Год веры. Ва ўрачыстасці прынялі ўдзел архіепіскап Кентэрберыйскі Роўэн Уільямс, Патрыярх Канстанцінопальскі Барталамей, удзельнікі Сіноду Біскупаў і 14 удзельнікаў Другога Ватыканскага Сабору.

Святы Айцец Бэнэдыкт XVI узначаліў раніцай 7 кастрычніка на плошчы перад ватыканскай базылікай св. Імшу на распачацце Сіноду Біскупаў па новай евангелізацыі. Літургія была спалучана з абвяшчэнне Дактарамі Касцёла св. Яна Авільскага і св. Хільдэгарды з Бінгена.

10 кастрычніка Святы Айцец Бэнэдыкт XVI благаславіць адарацыйны алтар «Зорка Казахстана», які будзе пасля перададзены ў санктуарый Маці Божай Каралевы Міру ў Азёрным у Казахстане. Праект рэалізаваны таварыствам «Communita Regina della Pace» ў Радоме (Польшча) і ўключае заснаванне 12 месцаў адарацыі Найсвяцейшага Сакрамэнту ва ўсім свеце ў інтэнцыі міру.