Мы распачынаем Вялікі пост, час вялікай міласці, час духоўнага адраджэння. Традыцыйна існуюць тры асноўныя кампаненты Вялікага посту: малітва, пост і міласціна. Тут я хачу прапанаваць 25 спосабаў перажыць перыяд Вялікага посту ў такім духу малітвы, посту і міласціны. Гэтыя 25 пунктаў размешчаны ў адвольным парадку, і я не прэтэндую на тое, што яны з’яўляюцца найлепшымі або найбольш крэатыўнымі. Тым не менш, калі вы шукаеце нейкія ідэі, то я спадзяюся, вы знойдзеце тут адну або дзве для сябе.

Вось гэтыя 25 спосабаў:

1. Чытаць Святое Пісанне (магчыма, выбраць адно з Евангелляў).
2. Чытаць духоўную літаратуру на працягу дзесяці хвілін.
3. Правесці дадаткова дзесяць хвілін у цішыні.
4. Маліцца Ружанец.
5. Маліцца Крыжовы шлях.
6. Спыніцца каля касцёла і памаліцца на працягу пяці хвілін па дарозе на працу або дадому (калі гэта магчыма).
7. Хадзіць штодзённа на святую Імшу або паспрабаваць адзін ці два разы на працягу тыдня, акрамя нядзелі.
8. Адкладваць штодзённа невялікую суму грошай і затым аддаць іх на дабрачыннасць у канцы посту.
9. Адмовіцца ад дэсертаў.
10. Адмовіцца ад шкодных для здароўя снэкаў (фаст-фуду).
11. Адмовіцца ад алкаголю.
12. Кінуць або скараціць спажыванне кавы ці гарбаты.
13. Адмовіцца ад хлеба.
14. Прачынацца раней, чым звычайна (уставаць, як толькі празвініць будзільнік).
15. Класціся спаць раней, чым звычайна.
16. Не карыстацца альбо траціць менш часу на інтэрнэт, асабліва на Facebook, Twitter і іншыя сацыяльныя сеткі.
17. Адмовіцца ад тэлебачання або скараціць час на яго прагляд.
18. Не слухаць радыё, калі вы за рулём; выкарыстоўваць гэты час для малітвы.
19. Не праглядаць электронную пошту некалькі разоў на дзень.
20. Пасціць па пятніцах, калі вам дазваляе здароўе (адзін прыём ежы ці проста хлеб і вада).
21. Тэлефанаваць сябрам або членам сям’і кожны дзень або некалькі разоў на працягу тыдня, каб пацікавіцца, як яны жывуць.
22. Прысвяціць некаторы час бедным (у сталоўцы, прытулку або ў іншым месцы).
23. Захоўваць спакой, калі вы за рулём.
24. Зрабіць сваё жыццё больш простым: кожны тыдзень праглядаць шафы і скрыні і пазбаўляцца ад адзення, аддаючы тым, хто знаходзіцца ў нястачы; кожны тыдзень пазбаўляцца ад кніг і знайсці месца, дзе яны будуць патрэбныя.
25. Пачынаць і заканчваць свой дзень на каленях.

А я буду маліцца, каб ваш перыяд Вялікага посту быў благаслаўлёны і святы!

Кс. Майкл Наджым
Пераклад з англійскай мовы Эльвіры Палінеўскай
ave-maria.by