1 мая 2011 г. у мясцовасці Пералом над Нёманам ў Гродзенскай пушчы адбыўся традыцыйны фэст св. Юрыя, на які з’ехаліся браты капуцыны з розных куткоў Беларусі. Некаторыя з іх прыбылі за некалькі дзён і жылі ў лесе, дзе калісьці знаходзіўся кляштар капуцынаў — калыска іх ордэна ў Беларусі. Тут браты духоўна рыхтаваліся да свята. На саму ўрачытасць прыйшла невялікая пешая пілігрымка моладзі з Гожы (дэканат Гродна–захад).

У 1938 г. у Пераломе над Нёманам быў пабудаваны кляштар капуцынаў. Ваеннае ліхалецце і савецкая ўлада знішчылі ўсё, што маглі. Толькі цудоўнае заступніцтва Маці Божай Пераломскай, да якой браты нястомна маліліся, учыніла так, што супольнасць заставалася ў гэтым месцы ажно да 1955 года, а адзін з братоў — бр. Крыспін — жыў у малой хатцы ў лесе нават да 1984 г.