1 лістапада парафія Унебаўзяцця Найсвяцейшай Панны Марыі ў Жалудку (Гродзенская дыяцэзія) урачыста сустрэла рэліквіі бл. Яна Паўла II. Вікарый парафіі ксёндз Андрэй Кеўлюк разам з міністрантамі прывезлі рэліквіі з дыяцэзіяльнага санктуарыя ў Тракелях.

На плошчы мястэчка рэліквіі чакалі вернікі з крыжам і харугвамі на чале са сваім пробашчам ксяндзом Янам Рэйшалем. Пасля ўшанавання рэліквій пробашч парафіі ўрачыста ўнёс іх у касцёл і змясціў на падрыхтаваным месцы. Святар заахвоціў вернікаў давяраць свае просьбы і клопаты бл. Яну Паўлу II.

Як інфармуе сайт Гродзенскай дыяцэзіі, падчас святой Імшы ксёндз Ян Рэйшаль звярнуў увагу на вялікі аўтарытэт Яна Паўла II, які з’яўляецца прыкладам для наследавання на шляху да святасці ў штодзённым жыцці.

У ходзе ўрачыстасці вакол касцёла адбылася працэсія і малітва за памерлых.

(AG)