28 лютага 2010 г. Святы Айцец Бэнэдыкт XVI накіраваў віншавальную тэлеграму Патрыярху Канстанцінопальскаму Барталамею І з нагоды 70-годдзя праваслаўнага іерарха. Патрыярх Барталамей нарадзіўся 29 лютага 1940 г.

Святы Айцец Бэнэдыкт XVI выказаў занепакоенасць у сувязі з забойствамі хрысціянскіх вернікаў у Масуле (Ірак). У аўторак 23 лютага 2010 г. там былі забіты тры чалавекі.

Падчас візіту ў Апостальскую Сталіцу міністр замежных спраў Літвы Аўдронюс Ажубаліс перадаў скіраванае да Святога Айца Бэнэдыкта XVI запрашэнне Прэзідэнта краіны Далі Грыбаўскайтэ наведаць Літву. 19 лютага 2010 г. міністр замежных спраў краіны сустрэўся з Сакратаром па адносінах з дзяржавамі Дзяржаўнага Сакратарыяту арцыбіскупам Дамінікам Мамбэрці.

Святы Айцец Бэнэдыкт XVI выказаў спачуванне сем’ям ахвяраў паводкі на Мадэйры (Партугалія). Спачувальную тэлеграму ад імя Папы накіраваў біскупу Антоніа Жозэ Карыльё Дзяржаўны сакратар Яго Святасці кардынал Тарчызіо Бэртонэ.

18 лютага 2010 г., згодна з традыцыяй, на пачатку Вялікага посту Святы Айцец Бэнэдыкт XVI сустрэўся са святарамі дыяцэзіі Рыма. Падчас сустрэчы Папа заахвоціў душпастыраў быць паслухмянымі Божай волі і развіваць у сабе сапраўдную чалавечнасць.

12 лютага 2010 г. Святы Айцец Бэнэдыкт XVI сустрэўся з каталіцкімі біскупамі Румыніі і Малдавіі ў межах візіту іерархаў ad limina Apostolorum. Папа заахвоціў біскупаў да клопату аб еднасці Касцёла ў гэтых краінах, а таксама да супрацоўніцтва з Праваслаўнай Царквой.

У нядзелю 14 лютага 2010 г. Святы Айцец Бэнэдыкт XVI наведае прытулак дабрачыннага каталіцкага фонду «Карытас», што знаходзіцца каля вакзала Тэрміні ў Рыме. У амбулаторыі аддзялення Папа сустрэнецца з медыкамі, санітаркамі і валанцёрамі.

Увечары 11 лютага 2010 г. працэсія з рэліквіямі святой Бэрнардэты Субіру і фігурай Маці Божай Фацімскай, якая праходзіла ў Апостальскай Сталіцы з нагоды ўрачыстасці Маці Божай з Люрда і XVIII Сусветнага дня хворага, завяршыла свой шлях пад вокнамі папскага палаца на плошчы Святога Пятра. Святы Айцец Бэнэдыкт XVI з вокнаў палаца ўдзяліў благаслаўленне сабраным на плошчы хворым і іх апекунам.

У Апостальскай Сталіцы апублікавана праграма візіту Святога Айца Бэнэдыкта XVI на Мальту, які адбудзецца 17–18 красавіка 2010 г. У межах візіту Пантыфік наведаў сталіцу Мальты Валету, Грот святога Паўла ў Рабаце і Фларыяну. Апостальская пілігрымка Папы звязана з 1950-годдзем з часу прыбыцця апостала Паўла на востраў.

10 лютага 2010 г. Святы Айцец Бэнэдыкт XVI сустрэўся з дэлегацыяй Евангелічнай Лютэранскай Царквы Амерыкі на чале з біскупам Маркам Хансанам. Падчас сустрэчы Пантыфік адзначыў патрэбу паглыблення дыялога паміж лютэранамі і католікамі, які распачаўся пасля Другога Ватыканскага Сабору.

4 лютага 2010 г. Святы Айцец Бэнэдыкт XVI звярнуўся са словамі прывітання да спартсменаў і арганізатараў Алімпійскіх і Паралімпійскіх гульняў у Ванкуверы (Канада). Алімпіяда будзе праходзіць у гэтым горадзе з 12 па 28 лютага, а паралімпійскія спаборніцтвы — з 12 па 21 сакавіка гг.

Падчас сустрэчы з каталіцкімі біскупамі Англіі і Уэльса, якая адбылася 1 лютага 2010 г., Святы Айцец Бэнэдыкт XVI пацвердзіў свой намер наведаць у бягучым годзе Вялікабрытанію. Аб планах Папы наконт візіту гаварылася раней, аднак дакладная дата не была вядома. Як было вызначана падчас сустрэчы, візіт адбудзецца ў верасні 2010 г.

Агульная малітоўная інтэнцыя Святога Айца Бэнэдыкта XVI на люты 2010 года гучыць наступным чынам: «За ўсіх людзей навукі і культуры, каб праз шчыры пошук праўды яны здолелі дасягнуць пазнання адзінага праўдзівага Бога».

28 студзеня 2010 г. у Ватыкане адбылося агульнае пасяджэнне Папскіх акадэмій, прысвечанае праблеме тэалагічнай фармацыі святароў. Святы Айцец Бэнэдыкт XVI з нагоды пасяджэння адзначыў, што галоўнай мэтай і абавязкам гэтых установаў з’яўляецца вернае служэнне Касцёлу і Апостальскай Сталіцы.