Святога Айца Бэнэдыкта XVI паядноўваюць асаблівыя сувязі з музыкай Вольфганга Амадэя Моцарта. Таксама і ўчора, 7 верасня 2010 г., у летняй рэзідэнцыі Папы ў Кастэль Гандольфа адбыўся канцэрт, падрыхтаваны для Пантыфіка Папскай Акадэміяй навук. У канцэрце прагучаў «Requiem» аўстрыйскага кампазітара.

5 верасня 2010 г. Святы Айцец Бэнэдыкт XVI склаў кароткі візіт у Карпінето Рамано (Італія), дзе 200 год таму нарадзіўся Джаакіна Печчы — будучы папа Леў ХІІІ. Падчас святой Імшы на плошчы Монці Лепіні з удзелам 5 тысяч мясцовых жыхароў Пантыфік адзначыў: «Ён быў мужам вялікай веры і глыбокай пабожнасці, што заўсёды з’яўляецца падставай усяго для кожнага хрысціяніна, не выключаючы і Папы».

5 верасня 2010 г., у нядзелю, Святы Айцец Бэнэдыкт XVI складзе трохгадзінны візіт у Карпінето Рамано (Італія), дзе 200 гадоў таму нарадзіўся адзін з яго папярэднікаў — будучы папа Леў ХІІІ. Там Пантыфік сустрэнецца з мясцовымі ўладамі і будзе цэлебраваць святую Імшу пад адкрытым небам.

2 верасня 2010 г. Святы Айцец Бэнэдыкт XVI удзяліў аўдыенцыю Прэзідэнту Ізраіля Шымону Пэрэсу. Лідэр Ізраіля сустрэўся таксама з Дзяржаўным сакратаром Яго Святасці кардыналам Тарчызіо Бэртонэ. Падчас размовы Папа і Прэзідэнт узгадалі аб мінулагодняй пілігрымцы Пантыфіка ў Святую Зямлю.

У найбліжэйшы час на кніжным рынку з’явіцца чарговая кніга Святога Айца Бэнэдыкта XVI пад назвай «La luce del mondo» («Святло свету»). Кніга пабудавана на аснове інтэрв’ю з Петэрсам Севальдам — нямецкім журналістам, дзве першыя кнігі якога на аснове інтэрв’ю з будучым Папам «Соль зямлі» (1996 г.) і «Бог і свет — вера і жыццё ў нашы часы» (2000 г.) сталі вялікім поспехам.

Як паведамляе Апостальская нунцыятура ў Кіеве, Святы Айцец Бэнэдыкт XVI накіраваў віншавальнае пасланне з нагоды 19-га Дня Незалежнасці Украіны, які адзначаўся 24 жніўня 2010 г., на імя Прэзідэнта Віктара Януковіча.

Другі том кнігі Святога Айца Бэнэдыкта XVI «Езус з Назарэта» з’явіцца 13 сакавіка 2011 г. у 20 краінах свету. Зараз над кнігай працуюць ватыканскія перакладчыкі. Наклад новага выдання перавышае 2 мільёны экземпляраў.

«Толькі Бог сапраўды можа супакоіць сэрца чалавека», — падкрэсліў Святы Айцец Бэнэдыкт XVI у пасланні на ХХХІ Мітынг любові народаў, які распачаўся 22 жніўня 2010 г. у Рыміні (Італія). Папа заклікаў удзельнікаў гэтага мерапрыемства сведчыць у сучасным свеце аб тым, што вялікія рэчы, якіх прагне сэрца чалавека, можна знайсці толькі ў Богу.

У абарону цыган, якіх дэпартуюць французскія ўлады, выказаўся Святы Айцец Бэнэдыкт XVI 22 жніўня 2010 г. пасля чытання нядзельнай малітвы «Анёл Панскі». У апошнія дні згодна з распараджэннем ураду паліцыя Францыі праводзіць рэйды ў цыганскіх лагерах з мэтай выяўлення цыган, што знаходзяцца ў краіне нелегальна.