4–6 снежня 2011 г. у парафіі Св. Мікалая, біскупа, у Геранёнах адбываліся адвэнтавыя рэкалекцыі. Падчас іх вернікі разважалі аб тым, што трэба рабіць, каб пасля смерці душа магла жыць вечна. Духоўныя практыкаванні праводзіў кс. Юрый Марціновіч.

Святар звярнуў увагу вернікаў на тое, што найперш неабходна пазбаўленне ад граху, які з’яўляецца хваробай душы, а калі хваробу не вылечыць у адпаведны час, яна прывядзе да гібелі. 6 снежня, ва ўспамін св. Мікалая, рэкалекцыяніст прыгадаў постаць гэтага святога і заахвоціў у штодзённым жыцці перамагаць зло дабром. Варта адзначыць, што ў галоўным алтары геранёнскай святыні знаходзіцца абраз св. Мікалая, біскупа, які жыў у IV ст. Абраз, намаляваны Анэляй Вольскай, прабывае ў парафіі з 1861 г.

Галоўную адпустовую Імшу ўзначаліў кс. Ян Гавецкі, дэкан Іўеўскага дэканату.

Да парафіі ў Геранёнах належаць таксама дзве капліцы Езуса Міласэрнага ў вёсках Сураж і Вінцукі. У гэтыя дні ў капліцах таксама адбыліся рэкалекцыі, у якіх удзельнічалі шматлікія парафіяне, каб узмацніцца ў веры і зведаць Божую ласку ў сакрамэнце пакаяння і паяднання.

У час Адвэнту ў геранёнскім касцёле з панядзелка па пятніцу праходзяць таксама раратнія святыя Імшы, у якіх прымаюць актыўны ўдзел дзеці і моладзь. Міністранты, ідучы з дому на ранішнюю літургію, званочкамі клічуць вернікаў на Імшу. Пасля Імшы дзеці разам са сваім душпастырам кс. Сяргеем Ангурам TChr, які з’яўляецца пробашчам з верасня гг., збіраюцца ў парафіяльным доме на супольнае снеданне, якое перад літургіяй рыхтуе моладзь. Затым маленькія парафіяне ідуць у школу, каб здабываць веды. Гэтая акцыя прыцягвае да Касцёла многіх дзяцей, якія ў перыяд Адвэнту з радасцю ўстаюць раней, каб зрабіць добры ўчынак і даць прыклад любові да Бога і бліжняга.