24 студзеня 2010 г. дапаможны біскуп Мінска-Магілёўскай архідыяцэзіі Антоні Дзям’янка цэлебраваў святую Імшу ў мінскім касцёле Узвышэння Святога Крыжа на Кальварыі. Гамілію іерарх прысвяціў духоўнасці і гісторыі Таварыства Каталіцкага Апостальства (палатынаў). Нагодай для ўрачыстага набажэнства стала гадавіна афіцыйнай рэгістрацыі мінскай парафіі Святога Барталамея, апостала, і святога Андрэя Баболі, у якой нясуць служэнне айцы палатыны.

У літургіі ўдзельнічалі святары з усяго дэканату на чале з кс. дзеканам Андрэем Бародзічам і айцамі палатынамі з розных парафій. Пасля святой Імшы парафіяльная моладзь выканала тэатральную пастаноўку пад назвай «Мой паламаны Хрыстус».

У гаміліі біскуп Дзям’янка згадаў аб духоўным заснавальніку супольнасці — святым Вінцэнце Палоцці, які працаваў у Рыме ў першай палове ХІХ ст. і, будучы заклапочаным станам і місіяй Касцёла, бачыў, што «не хапае людзей з апостальскім духам, якія б ажыўлялі рэлігію там, дзе яна згасае, і неслі яе туды, дзе аб ёй не ведаюць».

Іерарх распавёў аб асноўных элементах фундаменту, на якім засноўваецца духоўнасць палатынаў, — гэта «падпарадкаванасць дзеянням Духа Святога, адчуванне бясконцай Божай любові і міласэрнасці, глыбокае разуменне таямніцы Езуса Хрыста як Апостала Спрадвечнага Айца, яснае пазнанне ў святле Духа Святога, які ёсць і якім павінен быць Касцёл, прыняцце апекі Беззаганнай Марыі, Каралевы Апосталаў, імкненне ў апостальскай працы захоўваць дух любові і руплівасці, актыўнасць у духу наследавання Хрыста ў апостальстве Касцёла і дзеля яго ўзрастання і абсалютная падпарадкаванасць Касцёлу».

Поўны тэкст гаміліі тут >>>

Найбольш важным элементам як для святароў з супольнасці палатынаў, так і для ўсіх вернікаў біскуп назваў «наследаванне Хрыста, у якім за фундамент паслядоўнікі прымаюць Яго жыццё аж да ахвяры на крыжы і маюць надзею, што, паўстаўшы з мёртвых, разам з Ім дасягнуць найвышэйшай дасканаласці».