На працягу года на сустрэчах прыхільнікаў духоўнасці Кармэлю вернікі разважалі над постаццю св. Тэрэзы ад Дзіцятка Езус. Асобе св. Тэрэзы было прысвечана каля 12 канферэнцый. Апошнюю канферэнцыю з гэтага цыклу а. Пётр Фраштэнга OCD прамовіў 12 студзеня 2012 г.

Сустрэча ўключала ў сябе і дзяленне аплаткай, пасля чаго ўдзельнікаў чакаў салодкі пачастунак.

Спосабам евангелізацыі ў Кармэлі Тэрэза абрала для сябе любоў: «любіць і цярпець для Хрыста, каб магчы супрацоўнічаць у збаўленні свету». Дзякуючы любові, святая ўмела надаць сваім пакутам апостальскае вымярэнне — свае пакуты яна ахвяроўвала за няверуючых.

«Любячая душа не магла б бегчы адна, яна будзе прыцягваць за сабой іншых, — адзначыў падчас канферэнцыі а. Пётр Фраштэнга OCD. — Апостал ёсць чалавекам, які цалкам належыць Хрысту, цалкам канцэнтруецца на Хрысце і такім чынам, нібыта спантанна, прыцягвае іншых да Хрыста. Гісторыя вялікіх святых апосталаў пацвярджае такую логіку евангелізацыі: Ян Боска, пробашч з Арс, св. Дамінік, св. Тэрэза Авільская, Кацярына Сіенская… Любоў прыцягвае любоў».

Поўны тэкст выступлення тут>>>

Сваю місію св. Тэрэза ад Дзіцятка Езус жадала працягваць у небе. Яна не ўяўляла сабе жыцця ў небе ў выглядзе адпачынку, але як нічым не абмежаваную місійную дзейнасць. Будучы ў сэрцы Бога, яна прагнула палаць паўсюднай любоўю, каб у паўнаце рэалізаваць сваё місійнае пакліканне. Яна прагнула быць сябрам усіх людзей. У 1897 годзе ў лісце да а. Раланда яна пісала: «Я не паміраю, але ўваходжу ў жыццё, а ўсё, чаго не магу табе тут сказаць, дам Табе да зразумення на вышынях неба...»

Папа Пій ХІ 14 снежня 1927 г. абвясціў дэкрэт, у якім абвяшчалася пра кананізацыю Тэрэзы ад Дзіцятка Езус. У дэкрэце ішла гаворка пра тое, што «радаснае рэха, якім адгукнулася ва ўсіх верніках навіна пра кананізацыю св. Тэрэзы ад Дзіцятка Езус, сведчыць пра культ, які сёння існуе ва ўсім свеце; нават у найбольш аддаленых краінах гэтая святая панна кармэлітка не перастала спасылаць абяцанага „дажджу ружаў“».

Святая Тэрэза ад Дзіцятка Езус была абвешчана апякункай усіх місіянераў, мужчын і жанчын, а таксама існуючых у свеце місій, асаблівай апякункай нароўні са св. Францішкам Ксавэрыем, з усімі правамі і літургічнымі прывілеямі, якія адпавядаюць гэтаму тытулу.

Наступная сустрэча прыхільнікаў духоўнасці Кармэлю пройдзе 9 лютага.

Ілья Лапато