«Святар узяты з людзей і для людзей пастаўлены — каб яднаць людзей з Богам. Гэта чыніў ксёндз інфулат. Заахвочваў, павучаў, нагадваў, каб чалавек жыў Богам», — адзначыў дапаможны біскуп Мінска-Магілёўскай архідыяцэзіі Антоні Дзям’янка, распавядаючы аб постаці кс. інфулата Вацлава Пянткоўскага. 3 снежня 2011 г. святую Імшу ў Мядзведзічах (Пінская дыяцэзія) з нагоды 20-годдзя адыходу ў вечнасць гэтага святара ўзначаліў Мітрапаліт Тадэвуш Кандрусевіч.

Біскуп Дзям’янка ўзгадаў жыццёвы шлях кс. Пянткоўскага, які памёр ва ўзросце 89 гадоў, з якіх 60 служыў Богу і людзям у Касцёле як святар. У парафіі ў Мядзведзічах спачылы працаваў 44 гады.

Біскуп Дзям'янка, які прамовіў гамілію, распавёў вернікам гісторыю. Адзін журналіст запытаўся ў святара, ці шчаслівы ён. Святар прапанаваў журналісту правесці з ім адзін дзень. Пад канец дня святар запытаўся, ці зразумеў журналіст што-небудзь. «Так, я зразумеў, што святар шчаслівы Богам», — адказаў журналіст.

Такім жа шчаслівым, па словах біскупа Дзям’янкі, быў і кс. Пянткоўскі, які гэтае шчасце паказваў таксама іншым. «Ён дзяліўся з іншымі гэтым шчасцем. Сваім прыкладам, словам ён указваў і вёў у розных акалічнасцях лёсу іншых да Пана Бога, якога любіў, у якога верыў і якому служыў», — дадаў іерарх. Святар рабіў гэта, «рэгулярна і з пабожнасцю цэлебруючы літургію, навучаючы катэхізісу, выконваючы святарскія функцыі са шчырасцю ў служэнні вернікам».

«Дзякуем Богу за гэтага правадніка веры ў перыяд ночы атэізму для церпячага Касцёла ў Беларусі», — адзначыў біскуп Дзям’янка. Іерарх заклікаў прысутных маліцца аб вечным супакоі і радасці для кс. Пянткоўскага.

Ксёндз Вацлаў Пянткоўскі, Генеральны вікарый Пінскай дыяцэзіі, вязень ГУЛАГаў, быў выхавацелем маладых святароў. У часы ганенняў на Касцёл ён аранізаваў падпольную семінарыю, дзе рыхтаваў кандыдатаў да святарства. Два з іх — Антоні Дзям’янка і Казімір Велікаселец — сталі біскупамі. Сярод былых вучняў кс. Пянткоўскага таксама кс. прэлат Антоні Гей з Брэста, кс. прэлат Вінцэнт Лісоўскі з Ліды, кс. Генрых Акалатовіч з Валожына і многія іншыя святары. Былыя вучні кс. Пянткоўскага прымалі ўдзел у набажэнстве з нагоды 20-годдзя смерці свайго настаўніка.