Першая Камунія — адна з самых важных рэлігійных падзей, памяць пра якую кожны вернік захоўвае ўсё сваё жыццё. 5 мая гэты асаблівы сакрамэнт ў баранавіцкай парафіі Узвышэння Святога Крыжа прынялі 35 дзяцей.

Звяртаючыся да бацькоў на пачатку ўрачыстасці, пробашч парафіі ксёндз дэкан Валянцін Новак заклікаў іх быць годнымі сведкамі Хрыста для сваіх дзяцей, клапаціцца пра жывую веру і духоўнае развіццё сваіх нашчадкаў, аддаючы іх Божаму Провіду і апецы Найсвяцейшай Панны Марыі.

Завяршыўся гэты незвычайны ў жыцці дзяцей дзень агульным фотаздымкам на прыступках касцёла. Цяпер перад дзецьмі — так званы «белы тыдзень», падчас якога яны, апранутыя ў белае адзенне, як і ў дзень Першай Камуніі, будуць штодзённа ўдзельнічаць у набажэнствах.

Дарэчы, касцёл Узвышэння Святога Крыжа ў Баранавічах адметны тым, што нават у часы атэізму ён быў адчынены для вернікаў, тут з рук Слугі Божага біскупа Зыгмунта Лазінскага прымаў сакрамэнт канфірмацыі кардынал Казімір Свёнтэк.

Галіна Рыбалтоўская

Камунія — прыняцце Цела Хрыста падчас святой Імшы або падчас намашчэння хворых, якое асаблівым чынам яднае вернікаў са Збаўцам. Можа адбывацца ці толькі ў постаці хлеба, ці ў дзвюх постацях — хлеба і віна.

(SZh)