Святы Айцец у чарговы раз заклікаў да спынення ваенных дзеянняў ва Украіне. «Мае думкі зноў скіроўваюцца да ўмілаванага народа Украіны. На жаль, сітуацыя пагаршаецца і супрацьстаянне паміж бакамі ўмацоўваецца. Памолімся, перш за ўсё за ахвяр, сярод якіх шмат мірных жыхароў, і за іх сем’і, і папросім Пана, каб як мага хутчэй спынілася гэта жахлівае братазабойчае насілле», — сказаў Папа 4 лютага на заканчэнне агульнай аўдыенцыі ў ватыканскай Зале Паўла VI.

Жыццю жанчын у сучасным свеце і праблеме душпастырства ў гарадах будуць прысвечаны пленарныя пасяджэнні Папскай рады па культуры і Папскай рады па справах свецкіх. Яны пройдуць амаль адначасова і завершацца 7 лютага аўдыенцыямі ў Святога Айца.

Евангелле – гэта слова жыцця, яно здольнае змяняць людзей, нагадаў Папа Францішак 1 лютага перад малітвай «Анёл Панскі». Святы Айцец у чарговы раз заклікаў вернікаў падтрымліваць блізкі кантакт з Божым словам, прынамсі чытаючы штодзённа адзін з маленькіх евангельскіх урыўкаў.

Папа Францішак абвясціў аб сваім намеры наведаць Боснію і Герцагавіну. Аб гэтым Пантыфік паведаміў 1 лютага на заканчэнне малітвы «Анёл Панскі», звяртаючыся да вернікаў, сабраных на плошчы св. Пятра.

Хрысціянін павінен заўсёды захоўваць памяць пра сваю першую сустрэчу з Хрыстом і надзею, якая дапамагае крочыць па жыцці з адвагай веры, лічыць Папа Францішак. У сваёй гаміліі падчас ранішняй Эўхарыстыі 30 студзеня 2015 г. у капліцы ватыканскага Дому св. Марты.

Папа Францішак падзяляе боль сем’яў ахвяр выбуху, які прывёў да разбурэння радзільні ў заходняй частцы Мехіка. У выніку трагедыі, якая здарылася 29 студзеня, загінула двое дзяцей і медсястра. Каля 70 чалавек, з якіх больш за 20 дзеці, атрымалі раненні.

Святы Айцец больш не будзе накладаць паліі новым арцыбіскупам Мітрапалітам, як гэта адбывалася раней. Згодна з рашэннем Папы Францішка, гэты абрад будуць здзяйсняць Апостальскія нунцыі ў дыяцэзіях, дзе служаць новапрызначаныя іерархі.

«Аўшвіц» з’яўляецца крыкам страшэннага болю і цярпення і заклікам да будучыні, пабудаванай на павазе, міры і сустрэчы паміж народамі», — адзначыў Папа Францішак у сваім твіт-паведамленні, скіраваным з нагоды 70-годдзя вызвалення канцэнтрацыйнага лагера «Аўшвіц-Біркенаў», якое адзначалася 27 студзеня.

Пра важнасць асобы бацькі ў жыцці дзіцяці нагадаў Папа Францішак 28 студзеня падчас агульнай аўдыенцыі ў ватыканскай Зале Паўла VI.

У Нядзелю Божай Міласэрнасці 12 красавіка 2015 г. Святы Айцец будзе цэлебраваць Імшу для вернікаў армянскага абраду. Аб гэтым гаворыцца ў апублікаваным 27 студзеня афіцыйным календары літургічных цэлебрацый Пантыфіка з лютага па красавік.

Хрысціяне павінны даць свой адказ на глабалізацыю абыякавасці. Гэта думка знаходзіцца ў цэнтры паслання Папы Францішка на Вялікі пост, якое было апублікавана 27 студзеня 2014 г. «Калі мы адчуваем сябе добра і камфортна, канечне, забываемся пра іншых — чаго Бог Айцец не робіць ніколі, — нас не цікавяць іх праблемы, пакуты і несправядлівасць, з якімі яны сустракаюцца. І так наша сэрца ахоплівае абыякавасць», — напісаў Пантыфік.

У мінулыя выходныя ў Рыме завяршыў сваю працу Міжнародны кангрэс рухаў і аб’яднанняў, якія займаюцца тэматыкай сям’і і абароны жыцця. Арцыбіскуп Вінчэнца Палья, старшыня Папскай рады па справах сям’і, выступаючы на закрыцці форума, сказаў, што Касцёл мае патрэбу ў сведках надзеі, сужэнства і сямейнага жыцця, а не ідэалогіі.

«Важная не ласка фізічнага аздараўлення, але той факт, што Езус нас збаўляе і заступаецца за нас», — адзначыў Папа Францішак 22 студзеня падчас ранішняй Эўхарыстыі ў Ватыкане.