На супярэчнасць антысемітызму веры Касцёла звярнуў увагу ў інтэрв’ю агенцтву SIR старшыня Папскай рады спрыяння хрысціянскаму адзінству кардынал Курт Кох. Іерарх, які ўзначальвае таксама Папскую камісію па рэлігійных кантактах з іўдаізмам, узгадаў пра нядаўнія заявы на гэтую тэму кіраўніка Святарскага брацтва св. Пія Х біскупа Бернара Фэлле.

Кардынал адзначыў, што папа Бэнэдыкт XVI называе вызнаўцаў іўдаізму «старэйшымі братамі», тым самым падкрэсліваючы еднасць Старога і Новага Запаветаў і ўказваючы на непарыўныя сувязі, якія злучаюць хрысціян з іўдзеямі. Такі ж погляд прысутнічае ў дэкларацыі Другога Ватыканскага Сабору «Nostra Aetate», якая, па словах іерарха, нічога сёння не страціла са сваёй важнасці. «Не згаджаецца з гэтым толькі група лефеўрыстаў. Яна не прымае экуменічнага дыялога, кантактаў з іўдзеямі, а таксама свабоды веравызнання. У той жа час гэта цэнтральныя пункты вучэння Святога Айца. Калі ж нейкая група не прымае ні Сабору, ні вучэння Касцёла, трэба паставіць пытанне: як можа яна называць сябе каталіцкай? Гэта фундаментальная праблема», — сказаў старшыня Папскай рады.

Кардынал Курт Кох узгадаў словы старшыні Прэс-службы Апостальскай Сталіцы кс. Фэдэрыка Ламбардзі, прамоўленыя нядаўна адносна заявы біскупа Фэлле: «Усялякая форма антысемітызму з’яўляецца актам нехрысціянскім, і Каталіцкі Касцёл павінен з усіх сіл змагацца з гэтай з’явай».

Іерарх падкрэсліў таксама, што ад вучэння Другога Ватыканскага Сабору не можа быць павароту, і дадаў, што Папа не намераны супярэчыць свайму вучэнню.

(AG)