«Папа Францішак карыстаецца простай мовай, але з’яўляецца вялікім інтэлектуалам», — адзначыла журналістка Вірхінія Бонард, якая на працягу доўгіх гадоў супрацоўнічала з кардыналам Хорхе Берголіа ў якасці прэс-сакратара епіскапату Аргенціны. Па словах журналісткі, Святы Айцец «з’яўляецца вялікім мысляром».

У размове з «La Stampa», на якую спасылаецца Ватыканскае радыё, былая супрацоўніца Папы заўважыла, што Пантыфік «стараецца знайсці словы, зразумелыя ў любым кутку планеты». Яна падкрэсліла таксама «салідную адукацыю» Святога Айца і яго захапленне літаратурай, асабліва класічнай, узгадаўшы, што «летам у Аргенціне ён заставаўся адзін у курыі, каб праводзіць свой вольны час за вучобай і малітвай».

Яшчэ адзін аспект, на які звярнула ўвагу аргенцінская журналістка, датычыць адносін Папы да людзей. «Хорхе Марыа Берголіа ніколі не быў папулістам: яго жэсты і блізкасць да вернікаў павінны інтэрпрэтавацца правільна», — сказала яна і падкрэсліла, што часта Папа ідзе насуперак агульнай плыні і выражае сваю заклапочанасць свабодай людзей.

Вірхінія Бонард дадала, што кожны чалавек для Святога Айца з’яўляецца «важным суразмоўцам, бо ён разумее, што Езус глядзіць на нас як на асобных людзей». Гэтая рыса характарызавала яго як пастыра ў Буэнас-Айрэсе і характэрная для яго зараз, лічыць былая супрацоўніца Папы.

(AG)