З 15 па 17 студзеня 2010 г. у парафіі Найсвяцейшай Тройцы у Докшыцах (Віцебская дыяцэзія) адбыліся рэкалекцыі для вернікаў мінскай парафіі Святога Францішка Асізскага, якія пакуль не маюць уласнай святыні. Рэкалекцыі праводзіў а. Арыюш Малыска OFMCap.

Тэмай для разважанняў стала роля парафіі ў жыцці кожнага каталіцкага верніка і ў жыцці ўсяго Касцёла. Падчас рэкалекцый таксама ўздымалася пытанне праяўлення таямніцы веры ў штодзённым жыцці хрысціяніна. Удзельнікі духоўных сустрэч атрымалі магчымасць паназіраць за знакамі Божай волі ў сваім жыцці, зразумець каштоўнасць супольнай эўхарыстыі, якая дае сілы кожнаму хрысціяніну.

Рэкалекцыі сталі яшчэ адным крокам да яднання парафіянаў, да пошуку агульнага паміж імі.

Варта адзначыць, што докшыцкая парафія Найсвяцейшай Тройцы ў 2008 г. святкавала чатырохсотгадовы юбілей, што сведчыць аб моцных каталіцкіх каранях гэтай супольнасці.