Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Мітрапаліт Кандрусевіч удзельнічаў у завяршэнні ўрачыстасцяў 100-годдзя касцёла ў Красным
Беларусь - Мінска-Магілёўская архідыяцэзія
20.08.2012 13:50

19 жніўня 2012 г. Мітрапаліт Мінска-Магілёўскі арцыбіскуп Тадэвуш Кандрусевіч удзельнічаў у завяршэнні юбілейных урачыстасцяў 100-годдзя касцёла Унебаўзяцця Найсвяцейшай Панны Марыі ў Красным, якія распачаліся 15 жніўня. На працягу апошніх 5 дзён у гэтым касцёле адбываліся адмысловыя набажэнствы, прысвечаныя юбілею. Падчас св. Імшы Мітрапаліт удзяліў сакрамэнт канфірмацыі 60 вернікам.

У гаміліі Мітрапаліт падзякаваў Богу за гэты касцёл, які ў цяжкія часы ганенняў быў адзіным, куды ездзілі вернікі з Мінска. Гэта, па словах арцыпастыра, была тая «Мекка», куды сцякаліся людзі, каб спаткаць у сакрамэнтах Езуса і карміцца Ягонай ласкай. Іерарх распавёў таксама пра тое, як сам, будучы студэнтам Ленінградскага палітэхнічнага інстытута, у 1969–1970 гг. быў на практыцы на Мінскім аўтазаводзе, пісаў дыпломную працу і кожную нядзелю ездзіў у Краснае на Імшу. Гэта, з аднаго боку, «было вялікае шчасце і Божая ласка, а з іншага — патрабавала амаль што цэлага дня часу».

Кажучы пра тытул касцёла — Унебаўзяцця Найсвяцейшай Панны Марыі, — Мітрапаліт нагадаў пра тое, што ўзяцце Марыі на неба з целам і душой, — гэта наша будучыня, да якой мы прызначаны. Для яе дасягнення неабходна жыць так, як жыла Марыя. Перадусім неабходна «па яе прыкладу заўсёды згаджацца з Божай воляй і яе выконваць». «„Fiat“ Марыі распачало практычнае ажыццяўленне Божага плану збаўлення. Таксама і нашае „fiat“ дазволіць Богу Ягонай ласкай жыць у нашых сэрцах, — адзначыў іерарх. — Дапамогай гэтаму ёсць Касцёл. Колькі за 100 гадоў гісторыі красненскага касцёла ў яго сценах адбылося споведзяў, колькі Імшаў цэлебравалася, колькі было благаслаўлена шлюбаў, колькі хростаў, колькі св. Камуній, колькі людзей адсюль з малітвай было перанесена на месца вечнага спачынку? Гэта ведае толькі Бог, які жыве тут і тут спатыкаецца з чалавекам».

Асаблівае спатканне Бога з чалавекам, падкрэсліў Мітрапаліт, адбываецца ў сакрамэнце канфірмацыі. «Нашыя дзяды былі настолькі моцнымі верай, што перанеслі ўсе выпрабаванні. У новых абставінах свабоды веравызнання і адначасова новых выклікаў секулярызму значэнне Касцёла становіцца ўсё больш значным», — дадаў арцыпастыр.

Мітрапаліт Кандрусевіч заклікаў вернікаў карыстацца з паслугі Касцёла як мага часцей, каб быць здольнымі жыць па прыкладу Марыі. Сімвалічна, як адзначыў іерарх, што красненскі касцёл знаходзіцца высока на гары. «Каб далей глядзець, неабходна падняцца на гару. Таму не трэба баяцца падняцца на касцёльную гару, бо Касцёл — гэта Хрыстус, які жыве ў часе і прасторы. Гэта компас, які не дазволіць заблукаць. Гэта сакрамэнт паўсюднага збаўлення, які дае ласку і ўмацоўвае духоўныя сілы, каб будаваць шчасце на зямлі і прыйсці да вечнага шчасця ў небе», — сказаў Мітрапаліт.

Фота з падзеі тут >>>  

 

Пры выкарыстанні матэрыялаў сайта спасылка на Catholic.By абавязкова.

Спасылкі па тэме