Урачыстасць Хрыста, Валадара Сусвету, 25 лістапада 2012 г. у парафіі Беззаганнага Зачацця Найсвяцейшай Панны Марыі ў Мінску (Сухарава) была падвойным святам. У гэты дзень у прысутнасці бацькоў і выхавацеляў дзеці і моладзь парафіі ўступілі ў Эўхарыстычны рух маладых.

Дзеці склалі просьбу прыняцця ў шэрагі кандыдатаў, а моладзь, пасля некалькіх гадоў рэгулярных фармацыйных сустрэч, прамовіла першую прысягу. Урачыстае літургічнае набажэнства, адмысловыя дэкарацыі і незвычайнасць падзеі сталі вялікім перажываннем для бацькоў і ўсіх парафіянаў.

Вернікі парафіі выказалі ўдзячнасць сёстрам уршулянкам, якія праз Эўхарыстычны рух маладых здзяйсняюць важную справу выхавання маладога пакалення. На працягу гадоў педагагічнай працы сёстры распрацавалі таксама цікавыя фармацыйныя матэрыялы для ўдзельнікаў і дапаможнікі для аніматараў руху.

Кс. Андрэй Сідаровіч МІС