Перыяд Божага Нараджэння — вельмі цудоўны час. Менавіта на працягу гэтых дзён перажываецца шмат радасці. Святкаванне прыйсця Збаўцы да людзей, прыняцця Ім нашай чалавечай натуры ўзрушвае сэрца кожнага веруючага хрысціяніна. Менавіта ў гэты поўны радасці перыяд, 4 студзеня 2012 г., Мёры, як штогод, сабралі ўдзельнікаў з розных парафій Віцебскай дыяцэзіі на конкурс калядных спеваў «Зорка Бэтлеема».

На гэты раз у конкурсе ўдзельнічалі дзесяць груп: з Глыбокага, Мёраў, Шаркаўшчыны, Варапаева, Ахрэмаўцаў, Ёды-Барадзенічы, Удзела, Дзеркаўшчыны, Паставаў і Віцебска.

Удзельнікі былі рознага ўзросту, ад маленькіх дзяцей да студэнцкай моладзі. Конкурсная праграма перапляталася забавамі і прыгожым вясёлым спевам груп. У гэтым годзе адметнасцю была таксама прысутнасць у ліку журы Піта Паўлава (гурт «PETE-PAFF») і асабістага сакратара Апостальскага нунцыя ў Беларусі кс. Вячаслава Пялінка. Падчас выступлення дзяцей пад радаснае «брава» з’явіўся і біскуп Віцебскі Уладзіслаў Блін з цікавымі гасцямі, сярод якіх быў дырэктар пастаральнага цэнтра ў Мінску кс. Эдмунд Друз SChr, які адзначаў якраз дзень свайго нараджэння. Ад імя арганізатараў і ўдзельнікаў «Зоркі Бэтлеема» самая малодшая ўдзельніца конкурсу ўручыла кс. Эдмунду Друзу кветкі і прамовіла шчырыя пажаданні.  

Сам фестываль праходзіў у радаснай атмасферы. Адбылося шмат цікавых выступленняў, з якіх кожнае было па-свойму прыгожым і вясёлым. Вельмі яскравым, як адзначыла журы, у гэтым годзе было выступленне групы моладзі з Глыбокага, якую падрыхтавала с. Таццяна Данч. Моладзь парадавала ўсіх не толькі цудоўным спевам, але і танцамі. Біскуп Уладзіслаў Блін скіраваў да ўдзельнікаў словы шчырай падзякі за тое, што яны ёсць у парафіях, за іх радасць і таленты, якімі дзеляцца з іншымі.

Пасля конкурснай праграмы ўсіх чакаў вельмі прыемны сюрпрыз — канцэрт гурту «PETE-PAFF». Шмат радасці прынеслі спевы гурту, тым больш што ўсе маглі пабачыць сапраўдныя беларускія народныя інструменты і пачуць іх.

На заканчэнне былі ўручаны дыпломы і ўзнагароды. Перад гэтым кс. Вячаслаў Пялінак адзначыў, што менавіта на гэтай сцэне можна было ўбачыць сапраўдных дзяцей — бо ніхто не рабіў, як гэта зараз часта здараецца, з дзесяцігадовай артысткі дваццацігадовую. Прызавыя месцы занялі групы з Глыбокага, Ахрэмаўцаў, Дзеркаўшчыны, Паставаў, Шаркаўшчыны. Спонсарамі прызоў былі біскуп Уладзіслаў Блін, кс. Павел Самсонаў і, як заўсёды, пробашч мёрскай парафіі кс. Кшыштаф Мянкіна.

Што думаюць гледачы ці самі ўдзельнікі аб гэтым конкурсе? Некаторыя з іх далі вельмі цікавыя адказы.

Алесь Дземідовіч (гурт «PETE-PAFF»), Мінск: «Уражанні самыя пазітыўныя. Прысутнічаў на ім першы раз. Адчувалася атмасфера ўзаемнай любові і радасці, якая перадавалася, я думаю, усім. На маю думку, менавіта на гэтай сцэне нараджаюцца новыя таленты, якія могуць з цягам часу стаць сапраўднымі майстрамі. Вельмі добра, што ёсць такія мерапрыемствы».

Вячаслаў Дзямітка, Браслаў: «Я прысутнічаў на гэтым фестывалі ўжо чацвёрты раз. На маю думку, было лепш, чым у мінулым годзе. У гэтым годзе былі цудоўныя запрошаныя госці, што прынесла таксама шмат радасці. Магу сказаць, што час чакання не быў марны!»

Брат Яўген Хаданёнак MIC: «Першы раз на фестываль прыехаў сем год таму, быў тады ўдзельнікам. Зараз гляджу, як ён развіваецца з кожным годам і толькі радуюся. З’яўляюцца новыя твары, і больш дзетак, а гэта сведчыць аб нашай будучыні, аб тым, што Касцёл у нашай дыяцэзіі развіваецца і жыве».

Інна Стрыгаловіч, Варапаева: «Удзельнічаю не першы раз у гэтым фестывалі. Прымаю ўдзел не як у конкурсе, але праслаўляю Бога сваім талентам. Мне вельмі тут падабаецца, бо можна ўбачыць шмат моладзі з розных парафій, пазнаёміцца. Таксама, гледзячы на выступленні іншых, можна ўзяць штосьці новае для сябе».

Так і мінуў яшчэ адзін дзень радаснага перажывання перыяду Божага Нараджэння. Раз’язджаючыся, напэўна, усе думаюць, што прыедуць у наступным годзе і зноў з’яднаюцца не ў конкурсе, а ў радасным праслаўленні нованароджанага Езуса сваімі талентамі.

С. Марына Брылёнак