Папа Францішак 25 ліпеня 2014 г. нечакана прыйшоў на абед у сталоўку для супрацоўнікаў Ватыкана і Святога Пасаду. Нароўні з усімі іншымі яе наведвальнікамі Пантыфік стаў у чаргу з падносам у руцэ і ўзяў “пятнічную” ежу – рыбу і пасту. Затым Святы Айцец сеў за адзін ca сталоў разам з некалькімі ватыканскімі служачымі.

24 ліпеня Папа Францішак прыняў у Доме св. Марты ў Ватыкане суданку Мэрыям Ях’я Ібрагім Ісхак, асуджаную ў сваёй краіне на смяротнае пакаранне за адмову ад ісламу, а затым вызваленую пад ціскам сусветнай грамадскасці. Яна прыбыла з мужам і двума маленькімі дзецьмі ў Рым. Жанчына цёпла падзякавала Святому Айцу за падтрымку, а Папа выказаў падзяку за яе сведчанне.

Святы Айцец з болем успрыняў паведамленне аб аварыі пасажырскага самалёта паблізу тайваньскага горада Магун. Ён накіраваў тэлеграму за подпісам кардынала Дзяржсакратара Пьетра Параліна на імя арцыбіскупа Тайпэя, у якой Папа просіць перадаць свае шчырыя спачуванні сем’ям ахвяр катастрофы, запэўнівае ў малітве за ўсіх пацярпелых і складае пажаданні суцяшэння, сілы і спакою.

Чалавек малітвы, абвяшчэння евангелля і сведчання, але, перш за ўсё, «пастыр з пахам авечак, што значыць, блізкі да людзей», — такімі якасцямі павінен валодаць біскуп на думку Папы Францішка, падзяліўся ў інтэрв’ю ватыканскай газеце “L’Osservatore   Romano” кардынал Марк Уэле, прэфект Кангрэгацыі па справах Біскупаў.

“Дарагі брат! Я атрымаў паведамленне праз кс. Марыё Карнёлі. Я выказваю сваю блізкасць табе, сёстрам і ўсёй каталіцкай супольнасці. Я суправаджаю вас сваёй малітвай і блізкасцю. Няхай Езус благаславіць вас і Маці Божая вас абараняе. З братэрскім прывітаннем! Францішак” - гэта тэкст электроннага ліста, які Папа даслаў пробашчу адзінай каталіцкай парафіі ў сектары Газа айцу Хорхе Эрнандэсу. Паведамленне прыйшло да яго 17 ліпеня, якраз перад канцом так званага перамір’я паміж ваюючымі бакамі і пачаткам наземнай аперацыі ізраільскіх войскаў у гэтым раёне.

Папа Францішак прызнаўся, што “з заклапочанасцю” ўспрыняў навіны, якія прыходзяць з хрысціянскіх супольнасцяў у іракскім Масуле і іншых частак Блізкага Усходу. Як адзначыў Пантыфік 20 ліпеня пасля нядзельнай малітвы “Анёл Панскі”, гэта месцы, дзе паслядоўнікі Хрыста з самага пачатку хрысціянства жылі са сваімі суграмадзянамі, прапаноўваючы істотны ўклад у дабро грамадства, а цяпер вымушаны пакідаць свае дамы і ўцякаць ад насілля.

Святы Айцец Францішак са смуткам успрыняў навіну аб крушэнні самалёта «Malaysian Airlines» на ўсходзе Украіны — рэгіёне, дзе адбываецца супрацьстаянне. У спецыяльнай заяве Прэс-службы Святога Пасаду гаворыцца, што Пантыфік узносіць малітвы за шматлікіх ахвяр інцыдэнту і іх родных. 

Пасля “сардэчнага закліку” ў мінулую нядзелю да працягу малітвы за мір на Святой Зямлі Папа Францішак 18 ліпеня асабіста патэлефанаваў прэзідэнтам Шымону Перэсу і Махмуду Абасу, каб падзяліцца сваёй вельмі сур’ёзнай занепакоенасцю з нагоды цяперашняй канфліктнай сітуацыі, якая закранула асаблівым чынам сектар Газа.

Папа Францішак выказаў шкадаванне з нагоды нізкай нараджальнасці ў многіх еўрапейскіх краінах. Адмова мець дзяцей з’яўляецца часткай «культуры адходаў», якая адчужае ўсё, што непасрэдна не прыносіць матэрыяльнай выгады, сказаў Святы Айцец, выступаючы 12 ліпеня перад удзельнікамі міжнароднай канферэнцыі ў Ватыкане на тэму глабальнай эканомікі.

13 ліпеня пасля малітвы “Анёл Панскі” Папа Францішак прызнаўся, што з глыбокай заклапочанасцю сочыць за “трагічнымі падзеямі апошніх дзён” на Святой Зямлі. “Я яшчэ маю жывой у памяці сустрэчу, якая адбылася 8 чэрвеня 2014 г. з удзелам Патрыярха Барталамея, Прэзідэнта Перэса і Прэзідэнта Абаса, калі мы разам прасілі дару міру і слухалі заклік да спынення спіралі нянавісці і гвалту”, - сказаў Пантыфік.

Папа Францішак здзейcніць прыватны візіт у Казерту недалёка ад Неапаля. Ён запланаваны на 26 ліпеня 2014 г., праінфармаваў 10 ліпеня кіраўнік Прэс-службы Апостальскай Сталіцы а. Фэдэрыко Ламбардзі. Падставай да падарожжа стала сустрэча Святога Айца з пратэстанцкімі пастарамі, якая адбылася ў мінулым месяцы ў Рыме.