У парафіі Св. Андрэя, апостала ў в. Нарач адбылася малітоўная сустрэча, прысвечаная асобе благаслаўлёнага папы Яна Паўла II. Сваёю прысутнасцю святочную праграму аздобіў гурт Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску «Подых Духа».

Выхаванцы семінарыі, прадстаўляючы творы благаслаўлёнага Яна Паўла II, запрасілі ўдзельнікаў услухацца ў разважанні і малітвы Святога Айца. У святкаванні прымалі ўдзел таксама выкладчыкі семінарыі ў Пінску, айцы і браты кармэліты, семінарысты і шматлікія госці.

Кульмінацыйным момантам святочнага дня была супольная Эўхарыстыя. Гамілію прамовіў а. Аркадзь Куляха OCD. «Благаслаўлёны навучаў, што дарогай Касцёла з’яўляецца чалавек, — падкрэсліў а. Куляха. — А дарогай чалавека з’яўляецца ніхто іншы, як Хрыстус». Закранаючы галоўныя аспекты вучэння Яна Паўла II, святар узгадаў яго прыклад як вернага хрысціяніна, а таксама простую жыццёвую паставу Папы. «Хоць ён быў так высока ўзняты, аднак застаўся чалавекам простым і адкрытым. Узвысіўся ж у велічы праз тое, што застаўся самім сабой», — адзначыў а. Куляха.

Малітоўная сустрэча завяршылася каля помніка Яна Паўла II літаніяй да благаслаўлёнага. Помнік быў асвячоны Мітрапалітам Мінска-Магілёўскім арцыбіскупам Тадэвушам Кандрусевічам 16 кастрычніка 2008 г.