Турнір імя святого Яна Боска — сапраўднае свята для фанатаў гэтага віда спорта. З 10 па 25 студзеня пры парафіі Св. Яна Хрысціцеля ў Мінску праходзілі чацвёртыя спаборніцтвы, у якіх прынялі ўдзел 10 каманд — з Мінска, Слоніма і Барысава.

Па традыцыі, кожная гульня распачыналася малітвай, на полі забараняліся сваркі і жорсткія словы — гуляць можна і па-хрысціянску!

Што вельмі цікава, турнір быў не толькі святам футбалістаў, але і іх фанатаў. Перажыванні, радасць, сум — усе гэта было і па-за гульнёвым полем.

Моцна напружанымі былі паўфінальныя гульні, у кожнай з якой прымалі ўдзел каманды-гаспадары турніра. Вынік кожнай з гульняў вырашыўся толькі па булітах! Каманды аддавалі апошнія сілы, каб трапіць у фінал. У адрозненне ад мінулага года, калі склад паўфінальных гульняў быў такі ж самы, у фінал трапілі каманды-гаспадары.

Пераможцам турніра ў 2013 годзе стала мінская каманда «Савіо» —выхаванцы айцоў салезіянаў з серабранкаўскай парафіі. Менавіта ім перададуць Кубак Дона Боска пераможцы мінулага года — каманда «Госці салезіянаў».

Ганаровае ўзнагароджванне прызёраў турніра адбудзецца ў чацвер 31 студзеня падчас урачыстасці св. Яна Боска. Менавіта напярэдадні гэтага свята звычайна і праходзіць футбольны турнір.

Святы Ян Боска — заступнік і выхавацель моладзі і заснавальнік салезіянскай сям’і. Калісьці гэты святы збіраў бедных маладых хлопцаў па вуліцах Італіі, даваў ім магчымасць адчуць бацькоўскую апеку, адпачыць ад цяжкай працы, вучыў маліцца і любіць Бога. Заснавальнік салезіянскай сям’і адкрыў свой першы араторый 8 снежня 1841 года і пачаў яго з аднаго «Вітай, Марыя». Спачатку вандроўны араторый (бо не меў пастаяннага месца) працаваў адзін дзень у тыдзень — у нядзелю. Дон Боска запрашаў хлопцаў, каб тыя маглі адпачыць, пагуляць, у тым ліку і ў футбол, прыпомніць сабе дзяцінства, якога яны былі пазбаўлены, прыступіць да споведзі, паслухаць слова Божае, прыняць удзел у святой Імшы.

«Выхаваць сумленных грамадзянаў, добрых хрысціянаў і шчаслівых жыхароў Неба» — мэта, да ажыццяўлення якой імкнуўся Ян Боска. Ён даў прыклад евангелізацыі маладых людзей праз простыя рэчы: гульні, спорт, працу, добрае слова, прысутнасць і простую бацькоўскую любоў да моладзі!

Актуальнасць харызмы ксяндза Боска не паменшылася і сёння. Шмат маладых людзей патрабуюць прысутнасці сучасных Янаў Боска ў сваім жыцці. Праца айцоў салезіянаў у серабранкаўскай парафіі і моладзевым цэнтры таму пацвярджэнне.

Таццяна Перадкова, Ірына Петрусевіч