5 верасня 2011 г., у дзень смерці благаслаўлёнай Маці Тэрэзы з Калькуты, адбылася ўрачыстая святая Імша ў гомельскай парафіі (адзінай, дзе працуюць сёстры з Ордэна Сясцёр Місіянерак Любові, заснаванага самой благаслаўлёнай).  

У Гомелі існуе Дом Міласэрнасці, які служыць прытулкам для некалькіх дзясяткаў мужчын і жанчын, што апынуліся на вуліцы без сродкаў да існавання. Сёстры займаюцца іх доглядам, лячэннем, падтрымліваюць духоўна і псіхалагічна. Амаль кожны дзень сёстры рыхтуюць абед для бяздомных, колькасць якіх часам дасягае 80–90 чалавек.

Місіянеркі раздаюць прадукты і адзенне для бедных сем’яў і самотных састарэлых людзей. Дапамагаюць у гэтым і вернікі парафіі, ахвяруючы адзенне, абутак, посуд ці ежу.