22 чэрвеня ў касцёле Узвышэння Святога Крыжа ў Іванаве (Палескім) каталіцкая супольнасць малілася за спачылага кс. Тадэвуша Стэчкоўскага, які адышоў у вечнасць 14 чэрвеня 2012 г. У жалобных набажэнствах прынялі ўдзел біскуп Пінскі Антоні Дзям’янка і біскуп Казімір Велікаселец.

На працягу апошніх 15 гадоў святой памяці кс. Тадэвуш Стэчкоўскі выконваў абавязкі пробашча ў Іванаве. Акрамя гэтага, святар абслугоўваў парафіі Найсвяцейшай Тройцы ў Бездзежы і Маці Божай Каралевы ў Драгічыне, дзе займаўся будаўніцтвам касцёла.

«Апошняя старонка жыцця кс. Тадэвуша ўжо перагорнута. Кніга жыцця закрыта і апячатана. Няхай за руплівасць, прыгожы прыклад хрысціянскага жыцця і святарскага служэння Добры Бог дасць яму вечны супакой у сваім Валадарстве, дзе няма суму і нястачы, дзе ёсць вечная радасць ад сузірання Бога, Хрыста тварам у твар, да якога імкнуўся святой памяці кс Тадэвуш і якога ўказваў іншым», — адзначыў у гаміліі біскуп Дзям’янка.

Пасля набажэнстваў цела памерлага было пахавана на мясцовых могілках.